【now.com】周秀娜曾經反轉書展，之後咁多代「o靚」模，冇一個有佢咁有號召力。勢估唔到，幾年後嘅今日，周秀娜依然能夠在場外搶晒書展風頭。話說昨日周秀娜無啦啦在facebook預告：「我終於有得玩Pokémon Go喇，一陣5點半獨家率先Live玩港版Pokémon Go REAL，到時記得睇我Facebook Live！5點半見。」大家都知Pokémon Go係呢一刻世界最大潮流，亦係眾多90後其中一個最大童年回憶，可惜香港等極都未有得玩，人人都望穿秋水，呢個時候見到周秀娜咁講，當然哄動啦！
哄動唔係因為周秀娜，而係以為既然佢有得率先試玩，即是離Pokémon Go正式登陸香港不遠了！會唔會佢試完我哋即刻就有得玩呢？件事都好順理成章，launch一個遊戲，搵個明星做勢好正常吖！當所有人懷住巨大嘅期盼，準時去睇周秀娜玩Pokémon Go嘅時候，發現係一個陷阱，Pokémon Go就冇喇，原來係周秀娜真人扮比卡超玩遊戲。有冇搞錯？點解可以同講嘅完全唔同？一時間Facebook Live瘋狂俾嬲嬲，除咗梁振英之外我未見過咁震撼嘅嬲嬲海，一萬個都嚟緊，應該好快。
而家全香港對於仲未玩到Pokémon Go嘅失望、憤怒，全數轉移去周秀娜身上，我就覺得佢係唔係完全無辜嘅，收錢做嘢都要睇吓內容係乜先得㗎，一睇就知唔多對路啦！但周秀娜都係懵啫，罪魁禍首一定係Emax，由冇到有，一手一腳搞壇人神共憤嘅事出嚟，名不正言不順，既欺騙人，又唔係攞正牌，害到自己就梗㗎啦，害死埋周秀娜，究竟係想做marketing，定係做到個market停？
乜嘢文化會孕育到呢種思維？一個商場最重要係人流，呢個我明，但拍片做social media，係咪一樣只要人流，呃到人入嚟睇，就代表成功呢？其實質素更加重要，睇返條片，你呃到人入去睇，第一嬲你唔係真正Pokémon Go，第二嬲你都唔知拍乜，浪費大家時間，你話如果好有橋拍條好睇嘅live，條氣都順返啲，而家個感覺簡直係《精裝追女仔》參加港台群星超值團，結果去到要坐車頂同埋食垂涎三尺雞一樣，完全貨不對辦。
都唔係完全冇收獲嘅，結果成功捕獲小精靈「嬲嬲豬」，仲一次成萬隻咁多，你袋唔袋得晒先？
文：魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
專欄屬作者個人意見，不代表本網立場
