【A&M Diary】約女朋友食飯,又諗唔到食乜,日本菜絕對係一個無得輸嘅選擇!位於尖沙咀嘅鮨一主打新鮮空運海鮮魚生,由鮮甜肥美的海鮮刺身,到香氣濃郁的甲羅燒,每一道都各有特色,而鮮甜甘香嘅海膽,更成為鮨一嘅人氣名物,讓你實現海膽自由,絕對值得一試呢!
鮨一:蕃茄沙律
鮨一嘅師傅強烈推介,佢哋使用嘅係日本高糖度蕃茄,所以入口果然相當清甜,完全無咗蕃茄嘅腥味!旁邊仲有份量十足嘅八爪魚及油甘魚角切刺身:八爪魚口感爽彈,油甘魚則帶有濃郁魚油香氣,配上新鮮沙律菜及脆卜卜的蟹籽,口感層次相當豐富。
鮨一:清酒煮蜆
份量十足,而且隻隻蜆肉都大大隻,肉身厚實飽滿,非常鮮甜!以清酒烹調嘅湯底帶有淡淡酒香,但完全唔會蓋過蜆本身嘅天然甜甜味。配菜嘅蘿蔔亦吸收晒湯汁精華,清甜可口。
鮨一:辣酒煮廣島蠔
廣島蠔一向以肥美飽滿見稱,而鮨一嘅辣酒煮廣島蠔同樣無令人失望!每隻蠔都相當大隻,入口啖啖肉,蠔身肥厚之餘,亦保留了鮮嫩多汁嘅質感,配上帶有微微辣度嘅湯底,香辣滋味與廣島蠔本身的鮮甜互相配合,極具層次。
