【A&M Diary】一間會令人食過返尋味嘅車仔麵，重點一定係佢嘅秘製辣醬！位於尖沙咀嘅天下無雙，店家嘅辣醬夠晒惹味，絕對唔會令你失望。另外，車仔麵嘅份量十足，係有心經營嘅選擇。下次去尖沙咀留港消費，不如就去食碗地道嘅車仔麵啦！
無雙魷魚
魷魚被冠以店名：無雙，理所當然係店家嘅招牌啦！無雙魷魚份量十足，口感彈牙，而且非常入味，係啱晒大家share嘅小食啦！
藤椒魚皮
如果食得辣，私心推介呢碟藤椒魚皮。辣度一開始以為唔算強烈，但後勁嘅麻痺感唔簡單，加上魚皮爽滑彈牙，越食越惹味。
八寶麵餐
車仔麵嘅餸樣樣都想食，但又想經濟實惠，咁最啱就係叫八寶麵餐，仲可以幫助一眾選擇困難症嘅患者呢！八寶當中嘅豬腩肉、小花菇、豬皮同蘿蔔，真係好正，全部都吸收曬醬汁嘅味道，夠晒入味；至於八寶又點少得經典嘅陳皮魚蛋同雞翼尖呢，陳皮魚蛋彈牙又有魚味，而雞翼尖煮得夠腍夠入味呢！
豬八戒麵餐
食車仔麵梗有一個同豬有仇！豬大腸、豬耳、豬腩肉、豬皮、豬紅…無論裏裏外外都係豬，亦係車仔麵最受歡迎嘅食材！豬腩肉用上五花腩，肉同脂肪比恰到好處；豬耳條條爽口彈牙；至於豬大腸肥美得嚟又唔會太大舊，口感一流
