【A&M Diary】同大胃王肥肥出去食嘢，就梗係要食任飲任食放題，如果唔係埋單夾錢未好唔著數！食放題嘅食物選擇多，可以一次過食勻唔同嘅食物，今次嚟到旺角嘅御滿屋日本料理，由日式小食、壽司刺身、串燒炸物、一品料理等，近排仲可以免費升級，無限任食馬來西亞烤榴槤，呢個放題之旅確實滿意！
自助小食區
等緊落單嘅食物嚟嘅時候，最啱去自助小食區，有螺肉、中華沙律、八爪魚、泡菜、凍蝦同凍青口等，係一個唔錯嘅開胃小食，不過記住唔好食得太多，要留肚食其他嘢！
刺身
食放題係無可能唔食刺身，御滿屋有超過十款嘅刺身，包括：挪威三文魚、油甘魚、劍魚腩、希靈魚、鮑片、八爪魚、北寄貝、泰式生蝦、赤貝、帶子、松葉蟹棒、甜蝦同阿根廷赤蝦。全部嘅魚生都非常新鮮，三文魚肥美，阿根廷赤蝦鮮甜大隻，帶子清甜厚肉，赤貝爽口新鮮。
壽司 + 手卷 + 軍艦
御滿屋有多款壽司、手卷同軍艦，包括：火炙海鰻壽司、特濃芝士醬燒青口、特濃芝士醬牛肉、牛油果蟹肉他他壽司、海膽吞拿魚蓉壽司、花之戀、海膽手卷、蟹膏蟹肉手卷、香蔥吞拿魚手卷、燒汁鮑魚仔軍艦、海膽魷魚軍艦、蟹籽軍艦、芒果加州卷同芝士吉列蝦卷等。我哋特別鐘意芒果加州卷，芒果清新，非常開胃。
串燒
串燒都係放題必食之選，有鹽燒牛舌、燒有機菠蘿、鹽燒雞翼、鹽燒海蝦、汁燒帆立貝。串燒新鮮燒起，牛舌惹味，菠蘿清甜，雞翼惹味。
鐵板 + 燒物 + 一品料理
御滿屋嘅熟食選擇都好豐富，有麻辣小龍蝦、和風牛柳粒、竹笙瑤柱蟹肉翅、牛油炒粟米、蔥味秘制醬汁炒雞球、燒紐西蘭羊鞍、紅燒鰻魚、蒜蓉燒生蠔、鹽燒秋刀魚、瑤柱海皇粥、雪花牛鍋、辣酒煮加拿大翡翠螺、蝦湯海鮮泡飯、韓式泡菜海鮮鍋、牛肉烏冬、御品鮑汁燴花膠、美國薄燒牛肉、上湯勝瓜、青芥末蝦球、清酒煮蜆等。我哋推介蒜蓉燒生蠔，蒜蓉香味十足，生蠔大只厚肉；御品鮑汁燴花膠，花膠煮到好淋好入味，鮑汁味濃。
天婦羅 + 炸物
天婦羅同炸物啱曬鐘意食香口嘢嘅朋友，有帝王蟹棒天婦羅、茄子天婦羅、秋葵天婦羅、虎蝦天婦羅、南瓜天婦羅、椰汁流心球、三重芝士炸雞、吉列炸蠔、貓山王榴槤炸彈同芝麻雞翼！天婦羅新鮮炸起，熱辣辣，不過略嫌天婦羅炸粉有少少厚。
飲品區
御滿屋有兩大個飲品雪櫃，有多款汽水、啤酒、紙包飲品等。最吸引係任飲清酒同梅酒！
甜品 + 雪糕
御滿屋設有自助甜品區，有西瓜、哈密瓜、芝士蛋糕同泡芙等。另外仲有Häagen-Dazs、Dreyer’s D Collection同Movenpick雪糕選擇，食埋甜品真系好滿足。
