【A&M Diary】平時大家行山打卡都係以大自然風景為主，原來香港都有唔少軍事級數嘅打卡景點架！今日我就帶A姐嚟到粉嶺嘅皇后山打卡，唔好聽到個山字就以為有排行，其實識行或者跟住我哋以下嘅行程，唔洗5分鐘就會去到香港少見，以蓮花形狀為外觀嘅印度廟同皇后山軍營喇！呢度充滿荒廢感，啱晒大家影相打卡架！
提提你
1. 起點設有洗手間及補給站，請帶備足夠嘅飲用水前往
2. 大家記住保持環境清潔，自己垃圾自己帶走，絕對唔可以破壞大自然環境
3. 所有宗教場所都係一個莊嚴嘅地方，遊覽時保持聲浪，尊重自己，尊重宗教
4. 部份登山小路略為隱蔽，路況稍斜而且多碎石，但整體嚟講，難度唔算高，但都要量力以為呀
5. 印度廟及軍營蚊蟲眾多，應做足防蚊措施
前往方法
1. 由粉嶺港鐵站乘坐52B往鶴藪小巴，喺布格仔路落車
2. 落車後，沿村路行，直至見到布格仔公廁，後方就有一條小路登山
3. 參觀完後，沿路往返
皇后山印度廟
呢座皇后山印度廟被評為三級歷史建築物，更加係全港唯一以蓮花形狀興建嘅建築物，加上一啲都唔難行，所以成為大家近期嘅打卡熱點。
要前往皇后山印度廟其實一啲都唔難，首先搵咗流水響布格仔公廁。面對住公廁嘅左手邊，會有絲帶提醒你入口位置。大家要先穿過鐵絲網，然後沿鐵絲網一直行，大家一定要記住係沿鐵絲網行，千祈唔好跟絲帶，因為有啲絲帶會係另一條上山/落山路線嘅提示。鐵絲網嘅路線微斜，仲有啲碎石，而鐵絲網嘅另一邊就係皇后山公營房屋，但千祈唔好懷疑自己（我哋就同好多同路人一樣，誤信上山/落山嘅絲帶，最終盪失路，行咗半個鐘都搵唔到），但其實沿鐵絲網行5分鐘就會去到皇后山印度廟喇！
皇后山印度廟建於1960年代，被列為是三級歷史建築物，主要為駐守皇后山軍營嘅尼泊爾踞喀兵而建造，直至回歸前啹喀兵撤走，呢座印度廟就荒廢喇！保留落嚟嘅印度廟形狀呈六角形，內外以青藍色為主，而神壇位置就以紅色主打。至於頂部有六個尖頂，由12個三角形砌成，成為象徵美麗同神聖嘅蓮花形狀，充滿啹喀特色。
皇后山軍營
喺皇后山印度廟嘅後面，會有一個簷篷，沿簷篷行荒嘅路，再上20級樓梯左右就會去到皇后山軍營喇！
皇后山軍營原本為駐港英軍營房，依家喺荒廢嘅軍營入面，我哋仲見到辦公室同宿舍。但其實全盛時期嘅皇后山軍營，佔地相等於維多利亞公園，建有約20座嘅綠色平房，亦有辦公室、宿舍、戲院、加油站、操場、籃球場及草地，並由尼泊爾踞喀兵駐守。直至回歸後，曾改建為警犬隊總部、調查訓練學校同警察康樂中心。直至2003年新嘅警犬隊總部成立，丟空至今。
