【A&M Diary】小學讀常識科都有教過香港山多平地少，咁你又知唔知香港最高嘅三個山係邊幾個呢？太平山？馬鞍山？獅子山？等我依次序話你知正確答案啦：大帽山、鳳凰山、大東山。
香港第二高嘅鳳凰山位於大嶼山，海拔高度934米，雖然比大帽山矮23米，但因為大帽山最高點係天文台同解放軍嘅禁區，所以鳳鳯山係一般市民可到達嘅最高點。好多行山友都鍾意嚟到鳳凰山睇日出同雲海，我哋雖然唔係行山常客，但我同A姐都決定挑戰自己，登上鳳凰山！天公做美，我哋好幸運睇到日出，見到呢個靚景，我哋覺得一生人總要嚟一次，但由於太攰，所以亦覺得一生人只會嚟一次。
提提你
1. 鳳凰山嘅山頂部分極為陡峭，講求體力，請量力而為，注意安全
2. 鳳凰山中途無任何士多或洗手間，亦無遮無擋，請做足準備，例如帶備足夠嘅水同糧食登山
3. 鳳凰山嘅部份路段，梯級高度落差較大，建議帶備行山杖及勞工手套
4. 如果前往鳳凰山觀賞日出，沿途不設街燈，建議自備電筒方便登山（絕不建議使用手提電話照明，以防電話無電）
5. 山頂溫度會較地面低，而且非常大風，建議預備擋風衣物
伯公坳出發
登鳳凰山有2個出發點，較多人會選擇喺東涌乘坐尾班巴士到達伯公坳，再行大約3個鐘登上山頂。
昂坪出發
而我哋就選擇由昂坪出發，喺YHA昂坪戴維斯青年旅舍入住一晚，大概凌晨3點開始起步，往鳳凰山山頂出發。
YHA昂坪戴維斯青年旅舍
請留意！請留意！請留意！呢間唔係staycation五星酒店，而且更加係深山嘅一間旅舍，蚊、蜘蛛、蟻同小昆蟲就一定會有，所以我有時都好佩服A姐，佢絕對係能屈能伸嘅港女！
另外，旅舍亦有提供廚房用具，建議可以喺東涌買定食材入嚟煮嘢食，如果唔係就只可以返昂坪市集用餐（但好多餐廳5點就會閂門）。至於廚房用具係同所有營友share，所以千祈唔好打邊爐，我哋當日就有5個家庭打邊爐，搞到其他營友只係得番一個爐具使用，實在係非常自私嘅香港人。當然，記住要早啲瞓覺，養足精神，期待明早嘅登山活動。
鳳凰山日出
凌晨2點半，鬧鐘響喇，經過一番嘅賴床，心裡面不斷有睡魔叫我放棄嘅聲音，終於喺3點10分開始起步。經過咗心經簡林，大門口就有隻鳳凰迎接大家，正式開始登山嘅挑戰！（以下相片係第一日中午時候影）
首先，好抱歉，由於今次係高難道嘅線路，所以我哋為咗減輕背囊嘅重量，而未有攜帶較好嘅攝影器材，只係得部電話相伴，但一路上由於太黑，而未能同大家透過照片分享路途上嘅點滴。不過，一路上最難忘係印在腦海嘅每一個回憶，特別係由於無光污染，所以同A姐睇到一個好靚好靚，好難忘嘅星海！
由於我哋一開頭行得太慢，所以到後段，當越嚟越接近日出時間，我哋就越行越快，但山頂部分極為陡峭，依家諗返起都驚，所以大家記住預鬆啲時間上山呀！
最後，因為天公做美，我哋好幸運睇到日出，見到呢個靚景，我哋覺得一生人總要嚟一次，但確實太攰，所以亦覺得一生人只會嚟一次。
高度證明書
上到嚟934米嘅鳳凰山，當然要影番張相啦！
山區臨時避風站
由於山上面太大風，所以有唔少喺山上過夜嘅行山友，都會喺山區臨時避風站休息同擋風。
