【A&M Diary】成班朋友約食飯，點知你要OT，佢又未開完會，搞到晚餐都過埋last order，想搵間深宵食堂，不如去鳥居居酒屋啦！一踏入鳥居居酒屋，餐廳裝潢極具日式風格，由刺身、海鮮，以至燒物，選擇豐富。叫咗幾串串燒，加上餐廳嘅招牌菜，慢慢嘆、慢慢飲，絕對係放工嘅最強幸福感。
鳥居居酒屋：溫泉蛋豆腐沙律
沙律以蕃茄、豆腐、沙律菜為主，簡單淋上胡麻醬，再加上半生熟嘅溫泉蛋，就係平凡嘅幸福。
鳥居居酒屋：刺身四點、磯煮鮑魚
刺身四點分別有北寄貝、油甘魚、三文魚、赤蝦，每一款都非常新鮮！北寄貝同赤蝦就以爽口彈牙嘅口感作賣點；油甘魚同三文魚嘅魚油甘香，入口即化。另外，磯煮鮑魚就夠入味，口感有嚼勁。
刺身四點、磯煮鮑魚
鳥居居酒屋：鱈魚乾
微微烤過嘅鱈魚乾非常脆口，加上帶有七味粉嘅沙律醬作點綴，佐酒絕對一流！
鳥居居酒屋：味噌帆立貝
烤過嘅帆立貝外層略帶焦脆，內裡半生狀態，所以食落非常軟嫩。味道方面，帆立貝鮮甜當中滲入絲絲嘅鹹香，別有一番風味！
鳥居居酒屋：馬友
魚肉肉質鮮嫩，而燒過嘅馬友更將魚油嘅油份迫出，更香更豐盈。怕油膩嘅話，食嘅時候可以點上自家製嘅酸汁，更為醒神。
鳥居居酒屋：串燒四款
嚟到居酒屋，有點少得串燒呢！免治雞肉棒以滑嫩嘅雞肉包裹住脆卜卜嘅雞軟骨，加上蔥段，可以平衡番雞肉棒嘅油膩；一夜干雞翼經熟成過再燒製，所以肉質更為嫩滑，非常juicy；雞骹軟骨則骨肉相連，爽脆嘅口感中多咗份肉香，口感更為豐富；雞肉大蔥串嘅雞肉非常嫩滑，大蔥香濃，充滿層次。
鳥居居酒屋：燒茄子田樂
田樂味噌塗抹喺茄子上面，茄子索晒醬汁嘅精華，所以味道鹹香之外仲甜甜哋，非常惹味。
