【A&M Diary】日本有啲咩係令你最掛住呢？一定係所有嘢！但如果係所有嘢當中選擇一樣，相信一定係日本菜。我哋都有一段時間無去過日本旅行，想食日本嘢嘅心癮越嚟越強烈，隨意搵咗一間位於銅鑼灣嘅Omakase：鮨逸，15品有齊活龍蝦、真鯛、海膽等，加上餐廳近期推出優惠，性價比真係爆曬燈。
歡迎飲品
一坐低，鮨逸嘅店員就奉上一杯柚子酒作歡迎飲品，淡淡嘅柚子味，非常清新，夠晒醒胃。
鯪鯡魚肝 + 蟹肉蟹膏豆腐
兩款前菜都好有心思！鯪鯡魚肝配上蔥同辣蘿蔔，再加海帶同醋，完全都唔油膩，非常開胃：蟹膏豆腐配上絲絲蟹肉，蟹味濃郁，令豆腐味道更具層次。
活龍蝦刺身
活龍蝦刺身配上龍蝦膏同赤海膽，令鮮甜嘅味道更上一層樓。活龍蝦肉爽口彈牙，鮮味十足。
平靜魚刺身配海膽味豆腐
平靜魚爽口彈牙，魚味濃郁；至於豆腐上枱時呈淡黃色，原來製作豆腐時已預先加入海膽，細心之餘更令食客感到驚喜。
真鯛刺身
真鯛嘅魚肉肉質細緻，口感充滿彈性，味道雖屬淡口魚，但鮮味十足。
油坊主天婦羅伴海苔汁
油坊主嘅脂肪出名豐富，經天婦羅製作後，魚肉口感爽滑有咬口，配埋海苔汁，加添鹹香味。
縞鰺壽司
縞鰺係鰺魚中最高級、最肥美嘅一種，估唔到喺鮨逸嘅Omakase能夠品嘗到脂肪豐富，肉質肥嫩，纖細柔軟，口感順滑嘅完美口感。
磯粒貝壽司
磯粒貝非常新鮮，口感一流，再配上柚子皮同竹炭鹽，令中段嘅Omakase加上清新醒胃嘅感覺。
左口魚邊
左口魚邊輕輕炙燒過，迫出魚油後，油脂味更濃更豐富。
炙拖羅壽司
肥美嘅拖羅經火炙過後，接近入口即溶，升級滿足。
松葉蟹肉手卷
滿滿嘅松葉蟹肉感覺到餐廳一啲都唔吝嗇，蟹肉鮮甜，搭配特製嘅蛋黃漬，令蟹肉嘅味道更豐富更香濃。
