【Now.com】世界盃2026下月開鑼，Now TV連續三屆奪得香港獨家播映權，將直播全部104場賽事，ViuTV會免費直播25場。今日（4日）舉行記者會為賽事揭開序幕，大會更宣布由Edan@MIRROR（呂爵安）及Ivy So@COLLAR（蘇雅琳） 擔任Now TV「世界盃大使」，兩位人氣偶像即場分享睇波心得，仲齊聲表示今屆力撐阿根廷球王美斯！
記者會上首播二人拍攝的世界盃宣傳片，Edan一開口就自爆拍攝趣事：「拍嗰陣要大嗌，嗌到把聲都沙咗。去到後面我同導演講我扮嗌啦，我聽日要唱歌嗌唔到。」Ivy So則指拍攝時二人要齊齊扮演定格，十分有趣，師兄Edan亦好搞笑，有幾秒差點笑場。
講到今屆世界盃撐邊隊，二人異口同聲表示支持阿根廷。Edan希望美斯能再下一城，Ivy亦和應：「好想見到美斯再創奇蹟，因為都好有可能係最後一屆！」
至於新人男團ZPOT、TELLER（王偉俊）及Jacky Fan（范卓賢） 更在現場首唱世界盃打氣歌，即時炒熱全場氣氛。Jacky Fan又分享創作感受：「我喺世界盃主題曲擔任作曲部分，我投入咗好多熱情，希望帶到鼓勵、團結嘅感覺比大家！」TELLER則透露rap詞由自己創作。
記者會尾聲，Edan、Ivy更聯同ZPOT、TELLER、Jacky Fan、Kylie C.等一齊玩遊戲，分兩組對戰估足球術語，齊齊展現足球熱情。
記者會上舉行亮燈儀式
