【Now.com】FIFA世界盃 2026 仲有個幾月就舉行，作為大會指定廣播機構嘅 Now TV 同 ViuTV，今日 (4日) 舉行大型記者會，公布多項重磅消息！其中低時延（Low-latency）畫面技術，以及喺 Now TV App 睇波豁免本地流動數據用量，兩項都相當吸引！
大家除咗一如以往可以喺 Now TV 睇4K直播外，Now TV App 加入兩項全新功能，令睇波體驗全面升呢。大家可能試過睇波時，聽到隔離屋傳來入波歡呼聲，但自己睇緊嘅畫面仲未見個入球？呢個同 latency，即係網絡時延有關。香港電訊個人業務行政總裁林國誠分享時指，香港電訊引入全新技術及獨家專線，透過香港電訊旗下csl、1O1O 5G 及 Netvigator 極速寬頻，直接連繫 Now TV 內容分發網路，低時延編碼 (low-latency) 技術將影片切分成極小區塊傳輸，有效大幅減少緩衝時間。
▲香港電訊個人業務行政總裁林國誠指，喺 Now TV 網上平台睇世界盃賽事，影片載入速度比以往提升高達2倍。
林國誠表示，喺Now TV 網上平台，包括 Now TV 網站及 Now TV App 睇世界盃賽事時，影片載入速度比以往提升高達 2 倍， csl、1O1O 5G 及Netvigator 光纖客戶可以搶先見證精彩入球。「大家到時喺路上，喺辦公室、甚至屋企，當一嗌入球，嗰個會係HKT客戶！」
另外，csl、1O1O同Club SIM月費計劃客戶，喺 Now TV App 睇波，仲可獲豁免本地流動數據用量，呢個對睇今屆世界盃賽事好重要，因為賽事喺加拿大、墨西哥同美國舉行，好多場波都會喺香港時間朝早6、7點、9點，甚至中午12點舉行，即係大家出咗門口，返工返學嘅時間。豁免本地流動數據用量，唔使計住用咗幾多data，可以隨時喺香港盡情睇波，投入世界盃狂熱。
▲Now TV專業足球評述團隊
AI人工智能係大勢所趨，Now TV 亦趁今次世界盃推出全新「AI波友」，貼身陪大家睇波，用人工智能技術整合獨家多角度賽事數據、KOL及專業足球評述員分析，提供球賽及賽果分析，大家就可以掌握賽事走勢。「AI波友」以本地化方式呈現AI聊天內容，好似用上廣東話球員名稱、足球術語解答世界盃相關問題，更貼近本地觀眾。「AI波友」按用戶輸入嘅隊伍制定專屬觀賽日曆，無縫連接 Now TV直播或點播內容，方便追蹤焦點賽事。
即日起，指定csl、1O1O、Club SIM月費計劃、Now TV、網上行或HKT家居電話客戶，透過指定銷售渠道新申請、續約、升級或加購指定服務計劃並符合月費要求，即可以優惠價580元訂購 Now TV「FIFA世界盃2026賽事通行證」，欣賞全部104場賽事，建議零售價為港幣980元。
