【Viu】COLLAR今日以Day、Ivy So、芯駖做代表出席ViuTV《第十五屆全國運動會》記者會，談及芯駖去沙灘晒火辣三點式，有唔少網民求正面相，芯駖會唔會順應民意？Day又講咗咩爛gag幫手解圍？咁啱Ivy So近日都有飛咗轉日本，佢透露係開工嘅，見佢凌晨4點開live隊宵夜，但仍然keep得住個腹肌，果然係得天獨厚！
出咗新歌《これも愛》嘅Day，預告搵咗唔少朋友拍reels，咁唔知有冇dance version呢？日前見芯駖join咗子華神搞嘅East Day聯歡會，佢話開心同偶像合作，係一個好好嘅合作體驗，又大讚偶像好鬼死nice，一cue唱《藍天》就即唱！
ROVER三缺一同Brian陳安立再組「Over」，期間Jason自嘲因身高問題做唔成職業籃球員，大可以講波，Brian、Kim同希晉即建議佢可以做騎師，笑爆全場！講到畏高嘅Kim要搭水晶纜車去《叱咤》記者會，驚到標尿不特止，原來團隊仲開價1,300蚊叫Kim攤喺透明車底影相，但竟然畀佢一口拒絕，不過Kim都好開心可以孖男神林家謙同Jeffrey合照！而希晉喺噚晚首播嘅團綜爆喊，自嘲係「綜藝小雞」嘅佢，就笑認奇怪淚點不堪入目喇！
至於P1X3L就二缺一出動，講到George就嚟生日，好兄弟Phoebus、Marco又記唔記得係邊日？會點同壽星仔慶祝先？有傳「親生仔」P1X3L將會join年尾嘅澳門家族倒數騷，二子笑言係有聽聞過嘅，如果事成更係佢哋首個倒數騷！Marco小休咗幾個月，有冇破到A0「佛身」？Phoebus日前飛日本旅行，怕醜話見到好多kawaii嘅妹妹，有冇上前搭訕攞Line先？想知就要睇足本訪問啦！
