【Viu】《CHILL เก่ง Music Festival》今日宣布12月20日喺啟德體藝館舉行，P1X3L將同泰國人氣男子組合ATLAS crossover，不過三子笑話對方最主要係唱英文歌，所以未知有冇機晒泰文，希望唔會「Thai難」啦！
呢日見Phoebus好似寧舍靜，原來佢話呢幾日拍節目天氣轉涼病咗！點知講講吓個話題就扯咗落去Marco拍嘅戀綜度，Marco透露係有幾位台灣美眉，唔知佢有冇被嗲親或者係疊字「攻擊」？企隔離嘅George齋聽都係咁喪笑，唔知佢腦海有咩畫面呢？
相信大家最想知嘅係Marco嘅「佛身」情歸何處？點知Marco BB大嗌話想重新投胎，what？仲話想投胎做女兒身，寧願揀Phoebus都唔揀George，因為話嫌George太快！佢哋講嘅嘢出唔出得街㗎？
ROVER就預告到時會同師兄s MIRROR、ERROR夾band，希晉劇透話個歌list係好炸，有好多耳熟能詳嘅歌！佢哋最新推《陪我一路漫遊》，MV入面含四子嘅黑圖，邊個係黑圖專家？邊個最有偶包？
而喺日前《903籃球賽》，希晉、亨仔、Kim托高Jason射籃，但原來Jason本來係想扣球，點解最後做唔到？佢哋嗰日又有獻唱《男兒當入樽》片尾曲《直到世界的盡頭》，四子難掩hyper mode話好興奮！
另外，最近忙於綵排澳門騷嘅COLLAR就齊齊晒美腿，指到時會同泰國女子組合4EVE crossover，唔知有冇機會聽到COLLAR唱泰文歌？芯駖話想帶4EVE去食煲仔飯，而Ivy So話想帶4EVE去排隊？想知就睇足本訪問啦！
