【A&M Diary】我哋相信每一區除咗連鎖米線店，點都會有一間米線嘅代表作，所以我哋四出尋訪，推出咗在地人米線推介系列，等一班米線控同我哋一齊發掘最啱你口味嘅米線！繼屯門嘅雲貴風、灣仔嘅成都小巷、銅鑼灣嘅金西南米線之後，今次就得到佐敦在地人推介，嚟到呢間景霖正宗四川麻辣米線！如果你嗰區都有米線推介，就記住inbox話我哋知喇！
A姐之選：酸辣腩肉、冬菇米線（中辣走芽菜）
A姐叫啲餸有時都幾麻甩，但其實腩肉又確實係米線嘅靈魂配料，一層肥一層瘦，雖然好罪惡，但又偏偏好好味。呢度嘅腩肉夠晒軟腍又入味！至於冬菇就係用鮮冬菇，但鮮冬菇就唔係幾啱A姐心水喇！不過，我就覺得冬菇索晒湯汁，其實都唔錯。至於湯底酸酸辣辣，好開胃呀！
M佬之選：麻辣蘿蔔、鱈魚豆腐米線（小辣）
我今日就相反，叫咗啲好清淡嘅餸，包括清甜無揸嘅蘿蔔同鱈魚豆腐，至於湯底就選擇咗小麻辣，唔算太辣，米線掛晒湯，好好味。
沙嗲雞肉串燒
雞肉微燶，好香口，但串燒最重要當然係個醬汁啦，沙嗲味香濃，好惹味呀！
