【A&M Diary】放假打卡好去處？就梗係要留意A姐嘅「港去玩」專欄啦！佢成日都會計劃好行程，帶埋我呢個御用攝影師，陪佢發掘香港打卡又好玩嘅地方（但如果佢做家務都可以咁有恆心就好喇）！今日我哋嚟到位於美孚嘅饒宗頤文化館，以文化承傳為主題，將舊有嘅紅磚屋仔、白色小屋活化而成。呢度除咗打卡，亦適合大家過一個慢活文青嘅週末。
饒宗頤文化館
饒宗頤文化館為香港三級歷史建築，佔地約32,000平方米，分為上區、中區同下區。文化館前身為1904年嘅華工臨時居所、1910年嘅疫症隔離站、1920年嘅荔枝角監獄、1938年嘅荔枝角傳染病院、1948年嘅荔枝角醫院、2000年嘅長期護理院，直至2012年活化成饒宗頤文化館至今。
饒宗頤
饒宗頤教授生前就中國研究、東方學同藝術文化多方面有多項成就，亦曾於香港中文大學中文系任教。饒教授著作甚多，僅僅《饒宗頤二十世紀學術文集》就有十四卷二十巨冊，超過一千二百萬字，專著逾八十種；論文1000多篇。除此之外，他精通甲骨文。被學界稱為「南饒北季」。
下區
下區以天橋連接巴士站及美孚港鐵站，絕對係今次參觀最方便嘅入口。下區嘅建築群全部都係紅磚屋仔，佢嘅外觀已足夠令大家不停打卡。而屋內設有藝術館同保育館。其中喺保育館，就可以了解到整個文化館前身嘅歷史。
中區
離開下區，嚟到中區，由紅磚屋仔變成白牆小屋，又係另一個打卡熱點！原來早喺荔枝角醫院時代，中區同上區嘅小屋就油上白色嘅防潮油漆。而喺中區，除咗設有多用途室、課室、綜藝小劇場、資源中心、餐廳同市集，亦設有展覽館，定期舉辦文化歷史類型的專題展覽。
