【A&M Diary】無得去旅行唔緊要，最緊要大家身體健康，學識調節自己個心態姐，而我就有一種幸褔叫M佬！M佬趁疫情稍為緩和，就會安排唔同嘅節目，今日佢就帶我去咗日本京都嘅金閣寺喇！講緊嘅就係位於鑽石山嘅南蓮園池。南蓮園池其實是由志蓮淨苑設計建造同管理嘅免費公園，公園佔地約3萬5千平方米，採唐代風格為設計藍本，而公園種滿松樹同柏樹，真係好有日本嘅感覺（因為部份日本文化係唐朝傳入），而其中圓滿閣，就好有金閣寺嘅feel喇！
喺入去南蓮園池參觀之前，一定一定要留意，呢度嘅規矩係超多，而入面嘅管理員都會嚴格執行條例，所以記住要乖乖咁遵守規則。
中國木建構建築藝術館
透過中國木建構建築藝術館了解到呢到嘅建築方法係採用榫位連接，全靠精密計算而成，而完全無用到泥漿同釘子作建築。除此之外，亦睇到建築物上唔少嘅精雕細琢，好有驚喜。
圓滿閣
圓滿閣絕對係南蓮園池嘅必影打卡位！佢嘅外觀配上旁邊嘅松樹、柏樹同石頭，影出嚟嘅相真係好似去咗日本大阪嘅金閣寺。原來八角形嘅圓滿閣代表佛教淨土嘅八種殊勝功能，亦代表圓滿同祝福嘅意思。
松茶欄
呢個大漁池有很多錦鯉，鍾意賞魚嘅就要嚟呢到睇睇喇。
志蓮素齋
我哋今次嚟無食到齋菜，但素菜館外圍係一個小瀑布同水車磨坊，影相都幾靚。
石館
除咗中國木建構建築藝術館，呢到亦設有石館，展出唔同嘅石頭藝術品。而石館出面就有園藝區，放滿盤栽，每一個都好有心思。
意藝品
呢條手信街同樣好有日本風情，不過，我哋就無買到任何手信喇。
志蓮淨院
志蓮淨苑的中庭有兩個荷花池，被稱為梅池同詠池，志蓮淨苑有唔同嘅大殿，外觀影相都幾靚，但如果想參拜天王殿，就要留意開放時間至下午四點。而嚟到志蓮淨苑，就梗係要細味佢嘅建築風格啦！以唐代傳統木構建築為藍本，以榫接方式興建，都幾壯觀㗎！
