【A&M Diary】講起芬蘭旅遊，第一時間就會諗起北極光、聖誕老人村、姆明公園等芬蘭景點。而芬蘭除了冬季嘅冰雪世界之外，其實四季分明，喺城市以外更有不少大自然美景。今次嘅芬蘭旅程，特意嚟到秘境小鎮：約恩蘇（Joensuu），尋找芬蘭的森林與湖泊，從絕密景點、私房美食、地道體驗，親身感受全球最幸福國家，打造不一樣的芬蘭秘境旅程。
由香港前往芬蘭
由香港去芬蘭旅行，無論轉機定直航，大部份遊客都會先飛往芬蘭首都：赫爾辛基（Helsinki），再以赫爾辛基為芬蘭旅程嘅中轉站，前往芬蘭其他城市及景點。至於今次嘅目的地：約恩蘇（Joensuu），由赫爾辛基可選乘35分鐘的內陸航班或5小時火車即可到達，非常方便。至於到達約恩蘇後，建議大家自駕遊，旅程就更輕鬆方便啦！
約恩蘇絕密景點
1. Koli National Park
芬蘭有唔少絕美嘅國家公園，其中Koli National Park嘅山地森林草本資源非常豐富，所以空氣非常清新，可以盡情享受最純淨嘅氧氣放題。至於，Koli National Park有多條山徑線路，無論係經驗嘅行山人士定行山新手都總有適合嘅路線。而我哋就揀咗相對易行嘅山徑，行30分鐘左右就會去到觀景台，眺望整個皮耶利寧湖（Lake Pielinen），碧藍嘅湖水令人非常療癒。
2. Valamo Monastery
平時去唔少西歐國家都會參觀歷史悠久嘅教堂，而嚟到芬蘭，就可以參觀平時少見嘅東正教教堂。Valamo Monastery現址建於1940年，至今已有80年歷史，係芬蘭唯一嘅東正教男子修道院。東正教嘅教堂同平時天主教教堂好唔同，禮堂內掛上唔少畫像，當中唔少都極具歷史價值更保存於附設嘅博物館內。另外，喺Valamo Monastery內設有餐廳同紀念品商店，仲可以品嘗教會出品嘅美酒，配上芬蘭美食，如芬蘭傳統馴鹿肉，係一個由心領會嘅體驗。
約恩蘇地道體驗
1. 戳針（Punch Needle）
喺香港，我哋大部份人都比較少接觸美術，但其實我哋每個人都隱藏住藝術細胞，只係平時被繁忙嘅商業社會所影響，所以嚟到約恩蘇，不妨讓自己體驗平時生活上少接觸嘅活動，體驗一吓戳針（Punch Needle）啦！導師會先教我哋基本嘅技巧，再由構圖、用色、對比，製作出屬於我哋獨一無二嘅紀念品。
2. Villa Ruusula
旅行就係想自己完全沉溺喺當地，放鬆心情同時增廣見聞。如果你都有同感，又想認識芬蘭當地人嘅文化，就一定要嚟到Villa Ruusula體驗一吓芬蘭人嘅生活！一嚟到Villa Ruusula，就由園區負責人兼國際知名芬蘭民謠樂團Värttinä嘅創始人Sari Kaasinen以音樂歡迎我哋。除咗可以睇到佢嘅現場演唱之外，仲會教我哋玩芬蘭傳統樂器：康特勒琴（Kantele），一齊jam歌，用音樂將香港同芬蘭拉近。
除咗玩樂器之外，喺Villa Ruusula仲可以同朋友一齊玩芬蘭木棋（Mölkky）。芬蘭木棋源自於百多年前嘅Kyykkä遊戲，經過改良之後，芬蘭木棋成為歐洲嘅流行運動，而香港近年更引入芬蘭木棋，成為新興運動之一。遊戲以投擲方式為主，以策略同技巧，達到目標分數即可勝出。遊戲雖然容易上手，但過程緊張刺激，非常好玩！
講到人與人之間嘅交流，除咗音樂同體育之外，當然仲有美食啦！大家可以跟住Sari Kaasinen，學整喺芬蘭隨處可見嘅卡累利阿批（Karelian Pastry）。啱啱焗好嘅卡累利阿批，夠晒香口，而餡料由米飯整成，非常軟綿清甜。另外，大家仲可以喺Villa Ruusula嘅森林幫手採摘梅果、磨菇，為晚餐做好準備。晚飯由Sari Kaasinen炮製，試到唔同嘅特色芬蘭菜式。晚餐後，夜幕低垂，Villa Ruusula亦設有少量民宿，不妨喺度住番晚，喺星海下享受芬蘭浴，確實寫意。
