【A&M Diary】倫敦係一個平原，所以無高山，鍾意大自然嘅英國人，通常都會去到各區嘅公園郊遊野餐，如果長假期就會北上蘇格蘭欣賞崇山峻嶺。雖然倫敦無高山，但其實都有啲小丘陵，可以滿足一吓行山發燒友。推介呢條位於北倫敦嘅Hampstead Heath，雖然係北倫敦最高嘅山丘，但難道屬於低級，係一條適合一家大細嘅行山郊遊路線。
提提你
1. 除非你行細路，否則呢條路線完全無樓梯，屬於初級路線，但大家都要記住要量力而為
2. Hampstead Heath內設有洗手間及飲水機，但數量唔多，建議大家預備足夠嘅飲用水前往
3. 大家記住保持環境清潔，自己垃圾自己帶走，絕對唔可以破壞大自然環境
4. 如果諗住上山睇日落或夜景，沿途無街燈，所以大家記住自備電筒
5. 大部份路段接收訊號都非常良好，所以唔怕蕩失路，但都要喺出發前，搜尋一吓自己想去嘅路線，或參考以下嘅Hampstead Heath郊遊路線景點
前往Hampstead Heath方法
1. 地下鐵：Northern Line嘅Archway、Hampstead或Golders Green站落車，再步行前往
2. 地上鐵：Hampstead Heath站落車，再步行前往
1. 倫敦行山郊遊路線Hampstead Heath：Whitestone Pond
參考地圖
我哋由地下鐵Hampstead站落車，沿住商店街嘅斜路一直上，大概15分鐘就會去到Hampstead Heath嘅第一個景點Whitestone Pond。呢個Whitestone Pond就係倫敦版嘅天空之鏡，喺湖上嘅倒影反射天空嘅白雲，真係好靚架！
2. 倫敦行山郊遊路線Hampstead Heath：The Hollow Tree
參考地圖
呢棵樹之所以出名，全因佢係一棵空心樹。空心樹係因為樹心有真菌，而真菌侵蝕樹心作為養料，令樹心真空。所以呢棵樹嘅樹零雖然不詳，但要形成空心樹，都肯定需要好長時間。但大家影相嘅時候，千祈唔好走入圍欄，始終空心樹都有隨時倒冧嘅危機。
3. 倫敦行山郊遊路線Hampstead Heath：Parliament Hill Viewpoint
參考地圖
由空心樹出發，沿路嘅風景非常靚，兩旁都有大樹遮蔭，有少少似韓國南怡島嘅水杉路。大概行15分鐘，就會去到北倫敦最高嘅山丘：Parliament Hill。喺山頂嘅觀景台，可以遠眺倫敦泰晤士河兩旁嘅商業大廈群。我哋就提議大家可以預備野餐墊同野餐食物，喺呢個高地享受微風嘅英式慢活生活。
