【A&M Diary】倫敦，作為英國首都，係英國最大嘅城市，面積為1,572平方公里，比1,104平方公里嘅香港大42%，所以倫敦嘅交通網絡都比香港複雜得多，有多款公共交通工具，包括：地鐵Underground / Tube、地上鐵Overground、碼頭區輕便鐵路DLR (Docklands Light Rail)、巴士Bus、電車Tram、國內火車National Rail同水上巴士River Bus等。就算當地人都唔會記得晒咁多條地鐵線同地鐵站名，更加唔好講話會記得晒600幾條嘅巴士線。我哋就為大家整理咗以下8大英國倫敦公共交通工具嘅簡介、甚麼是TfL、倫敦交通實用資料、路線圖、Pay as you go付款方式、Citymapper手機App有咩好用等，等你一文睇清英國倫敦實用交通攻略。
甚麼是TfL？
英國人好鍾意用簡寫，平時搭車聽廣播又或者同事都有講過TfL，究竟咩係TfL？TfL全寫係 Transport for London，即係倫敦運輸局，負責管理英國大倫敦地區嘅公共運輸系統，包括：地鐵Underground / Tube、地上鐵Overground、碼頭區輕便鐵路DLR (Docklands Light Rail)、巴士Bus、電車Tram、國內火車National Rail同水上巴士River Bus等。
倫敦巿內公共交通工具：Underground / Tube 地鐵
Underground係英國倫敦市內嘅主要交通系統，於1863年1月10日通車，有超過150年歷史！Underground顧名思義係喺地底下面運作，到近郊地區先會喺地面行駛。Underground又叫做Tube，因為地鐵好似喺管道一樣嘅圓形隧道入面行駛，而Underground車站入面嘅行人通道都好管道咁。
倫敦Underground共有12條路線、超過270個車站，每日載客量平均高達304萬人。每條Underground嘅路線都會途經Zone 1市區，方便市民由屋企或郊區去到市區。不過Underground大部份嘅車站都係無電話訊號，所以大家記住喺入閘之前一早搵定路線！
Bakerloo Line
Central Line
Circle Line
District Line
Hammersmith & City Line
Jubilee Line
Metropolitan Line
Northern Line
Piccadilly Line
Victoria Line
Waterloo & City Line
Elizabeth Line
倫敦巿內公共交通工具：Overground 地上鐵
Overground係英國倫敦比較年輕嘅交通系統，於2007年正式投入服務，共有6條路線。Overground經過多年嘅發展，組成圍繞倫敦嘅環狀鐵路，路線嘅特色係車站都唔會經過Zone 1，有效分散人流，舒緩市區嘅交通，提升整個鐵路系統嘅載客量。Overground嘅票價較低，最啱係唔趕時間或者週末嘅時候乘搭。
Richmond and Clapham Junction to Stratford
Watford Junction to Euston
Gospel Oak to Barking
Highbury & Islington to New Cross, Clapham Junction, Crystal Palace and West Croydon
Liverpool Street to Enfield Town, Cheshunt (via Seven Sisters) and Chingford
Romford to Upminster
倫敦巿內公共交通工具：DLR (Docklands Light Rail) 碼頭區輕便鐵路
倫敦另一鐵路系統係DLR，全名叫Docklands Light Rail，係英國倫敦嘅高架中運量鐵路系統，於1987年通車。DLR採用無人駕駛技術，所以車廂無駕駛廂。列車以兩至三卡為一列，每卡左右兩邊均各設四道車門。
倫敦巿內公共交通工具：Tram 電車
倫敦Tram電車，以前叫 Tramlink 輕軌電車，係倫敦南部嘅有軌地面電車系統，於2000年啟用，設有三條路線。
Wimbledon to Elmers End
Wimbledon to Beckenham Junction
New Addington to West Croydon
電車站連接地鐵Underground / Tube、地上鐵Overground、巴士Bus同國內火車National Rail，十分方便。
倫敦巿內公共交通工具：Bus 巴士
雙層紅色巴士喺市中心穿梭絕對是倫敦嘅代表，最啱打卡影相！倫敦嘅巴士網絡龐大，覆蓋倫敦市中心同周邊地區，有超過670條巴士線同9,500架巴士 (截止2018年)，由19間營辦商營運。每架倫敦巴士都設有廣播同顯示器，所以大家唔使驚唔知係邊個站落車。部分巴士路線仲提供通宵服務，出夜街都好方便。
大家要留意倫敦嘅巴士係唔收現金，大家一定要用有非接觸式付款功能嘅扣帳卡Debit card 或信用卡 Credit card、Oyster card、Visitor Oyster card、Travelcard或 Bus & Tram Pass付款。
倫敦巿內公共交通工具：National Rail 火車
英國全國設有National Rail，連接英國各大城市。倫敦市中心同近郊地區都設有好多火車站，如果就啱班次，可能仲會快過搭地鐵Underground，所以鐵路係出入倫敦市區嘅另一選擇。
倫敦巿內公共交通工具：River Bus 水上巴士
Thames River 泰晤士河絕對係倫敦嘅重要地標之一，大部份市中心景點都係沿河而建。倫敦設有多條水上巴士同泰晤士河觀光路線，適合市民出行同遊客觀光。
River Bus RB1 (Battersea Power Station Pier to Barking Riverside Pier)
River Bus RB2 (Battersea Power Station Pier to North Greenwich Pier)
River Bus RB4 (Doubletree Docklands Nelson Dock Pier to Canary Wharf Pier)
River Bus RB6 (Putney Pier to North Greenwich Pier)
倫敦交通Pay as you go付款方法
倫敦搭車接受多種付款方法，不過單程飛嘅票價昂貴，大家應該用以下Pay as you go方式搭車：
Contactless Payment – 大家可以用有非接觸式付款功能嘅扣帳卡或信用卡 (debit or credit card)、又或者Apple pay, Google pay同Samsung pay 。大家唔洗預先充值付款，只需要每次入閘同出閘拍卡就得，會直接扣數，而且仲可以享每日同每星期嘅票價上限 (Daily & Weekly Cap)。
Oyster Card – 藍色嘅Oyster Card類似香港嘅八達通，要預先增值，每次使用會直接扣款。使用Oyster卡嘅車費比單程票價平，而且仲可以享每日同每星期嘅票價上限 (Daily & Weekly Cap)。
Travel Card – 另一個選擇就係Travel Card，有分7日，每月同每年嘅Travel Card，可以無限次喺倫敦市內乘坐Underground、Overground、Bus、Tram、TfL Rail、River Bus等。
實用英國倫敦交通手機App：Citymapper
網址：citymapper.com
倫敦交通系統複雜，有多款交通工具同路線選擇，加上交通系統時不時都會有延誤，所以好難單憑記憶去搵出最快捷嘅交通路線。我哋建議大家下載Citymapper手機App，只需要輸入你要去嘅目的地同起點，佢就會搵出多條交通路線建議，大家仲可以根據自己嘅要求篩選只係搭火車、巴士、地下鐵嘅路線。每條建議路線仲會有票價資料，就可以比較唔同路線嘅車費。另外，佢仲會話畀你知係邊一個車廂部分上車會最方便轉車或離開車站。
