【A&M Diary】中環係香港商業及政治嘅心臟地帶，所以喺中環有好多摩天大廈，但喺呢個繁忙嘅商業城市入面，竟然有一座戰前就已經落成嘅中環街市，中環街市喺1990年獲評為三級歷史建築，直至2003年因使用率低而關閉。經過18年嘅活化，中環街市以Playground for All嘅概念全新亮相，除咗有唔少復古打卡位，仲引入本地品牌，啱晒大家嚟到打卡、漫活同做一日藝文青啦！
中環街市：前世
活化前嘅中環街市喺1842年建成，之後街市經歷咗多次重建，現時嘅中環街市係建於1939年嘅第四代。第四代嘅中環街市設計實用簡約，樓高4層，最高峰時超過200個攤檔。喺日佔時期，中環街市被改名為中央市場，而中央市場呢個名一直用到1993年。另外，喺1993年，中環街市嘅上層為配合半山自動扶手電梯而改為中環購物廊，直至2003年因使用率低而關閉。
中環街市：今生
政府本身想拆咗中環街市改建為商業大廈，但最後回應社會嘅保育意識，將中環街市保育及活化。經歷長達18年嘅活化（好彩最後無爛尾收場），中環街市以Playground for All嘅概念喺2021年全新開幕，並引入文化、文藝、文青、綠色小店等多個本地品牌，加上公共綠化嘅休憩空間，成為區內市民或附近上班族嘅休憩地點。另外，中環街市亦定期舉辦唔同種類嘅文娛文化活動，令大家相隔一段時間，就會想重臨中環街市體驗藝術嘅樂趣。
中環街市：復古打卡
中環街市以包浩斯建築風格建成，每一層都有一排排嘅窗戶，喺中庭又可以通風同引入自然光。所以活化後嘅中環街市保留咗原有嘅特色，其中最受大家歡迎嘅復古打卡位就係水磨石主樓梯喇！另外，中環街市亦活化保留咗13個完整嘅攤檔，當時主要售賣魚類、家禽、肉類同蔬果，相信係唔少人嘅集體回憶。另外，中環街市入面亦有多個QR code，大家可以用手機掃描，了解中環街市嘅故事。
中環街市：新派打卡
除咗活化保育嘅復古打卡位，喺中環街市亦有唔少新派嘅藝術品，其中呢個街市紅燈區就係中環街市嘅代表作品之一喇！呢個紅燈區唔係嗰啲紅燈區，呢個藝術品係由多個街市嘅紅燈組成，係最多人流嘅打卡熱點！
中環街市：餐廳小店
活化後嘅中環街市融入美食、購物、工作、休閒玩樂等餐廳同小店，啱晒大家喺度慢慢尋寶，或嘆杯咖啡，享受一吓漫活嘅步調。其中，「叮叮老香港辦館」就以電車為主題，除咗售賣電車紀念品，仲有雞公碗、爆炸糖等香港情懷嘅物品添。
