【裝修佬】戶主：「廚櫃的石英石枱面，擋水唔係邊位滑高，而係一條石條黐上去，很肉酸，同我send畀佢張相完全唔同！師傅話石英石係咁。但我在網上搜集資料，見到話而家石英石枱面加工技術高咗，已經可以造到好似人造石咁，無縫拼接渾然一體！點解師傅做唔到啊？」我哋再請裝修學院校長Simon回覆。答案如下：
「首先，如果問題是問石英石的擋水是否有接駁口見到，我會答係。戶主指出網上話石英石也可渾然一體，呢個係講緊最新技術。石英石價格每尺由300多元到2000多元不等。主場標準必然是指一般用料和做法，而並非最新最貴的技術。至於戶主提供發給師傅的相片不是這樣。我覺得這帶出一個重要的常見裝修中伏位。
我在裝修防伏班也常常提醒戶主，用相片溝通是極易產生誤會的。師傅看到你提供的相片，未必會認為你需要在顏色、款式、尺寸、規格上跟足圖例，可能他的理解就是你想造擋水，而造法就按選用的物料，按正常的做法去做──除非該物料有多種造法才提供選擇。
當然，戶主並不同意師傅的看法，但僅僅因為雙方觀點不同，往往未能達到可法律追究的界線。因此，如戶主不想因溝通誤會而令自己裝修成品未如預期，就可以在溝通上多走一步，具體講清楚自己的要求，否則出現問題，縱使大家也有部分責任，但損失和不高興的卻是自己。」
