【A&M Diary】將軍澳有唔少新樓盤同屋苑，今日嚟到呢區睇樓，睇吓姐，應該係無錢買嘅！哈哈！行咗好耐，真係餓到懷疑人生，所以今日決定食個快餐醫肚啦！澳南海岸有唔少餐廳，望住大海食飯，真係有少少澳洲嘅感覺呀！我哋就選擇咗走韓風嘅炸雞快餐店嘅OMG Chicken，呢個二人餐又幾抵食喎！
沙律
沙律菜混合咗唔少蔬菜，種類繁多，用上酸酸哋嘅醋調味，非常開胃！另外，除咗沙律菜之外，仲有番茄仔同甜橙，仲咗健康啲，亦為酸酸哋嘅沙律加上甜味，酸酸甜甜，非常好味。
原味薯條
薯條即叫即炸，炸到脆卜卜，非常新鮮！另外，薯條亦加入自家調味，夠晒惹味。薯條份量仲要唔少，非常滿足。
甜辣烤雞6件
雞表面烤到乾身，少少脆口但又唔會熱氣，至於雞肉keep到肉汁，時間掌握唔錯！另外，表面塗上大量甜辣汁，又甜又辣好惹味！
煙三文魚羽衣甘藍Pizza
Pizza份量大小適中，兩個人食就啱啱好。餅底上面鋪滿芝士，芝士濃香，而配料就有煙三文魚同羽衣甘藍，不過，由於配料只係放上Pizza面，所以同個Pizza好似係兩件事咁，下次要試試其他Pizza口味先得。
