【A&M Diary】觀塘除咗有好多茶記之外，其實仲有好多隱世嘅cafe。所以近期喺觀塘返工嘅A姐，決定四圍搵食，為繁忙嘅工作尋找小幸福！今日我就嚟到觀塘嘅ねずみの王冠喫茶店，餐廳以日式和風為主打，除咗嘢食之外，仲有售賣日式商品，突然間有種喺日本返工放lunch嘅感覺。
宮歧唐揚南蠻炸雞定食
宮歧唐揚南蠻炸雞即叫即炸，炸到非常香脆，絕對係ねずみの王冠喫茶店嘅名物！雞肉先用南蠻漬醃製，炸起後淋上蛋沙律醬汁，味道好有層次，好惹味。加上份量超多，夠晒抵食！定食套餐仲會配埋一碟前菜、麵豉湯同一碗飯，一個女孩子絕對食唔晒呀！
