〈好遊〉[馬灣好去處] 拍拖親子小旅行　8大必遊打卡熱點

【A&M Diary】如果馬灣畀你嘅印象就只有挪亞方舟同珀麗灣，咁你就大錯特錯喇！馬灣嘅旅遊資源其實相當豐富，除咗挪亞方舟主題公園，仲有東灣沙灘、青馬大橋、古舊遺跡，仲可以行山打卡，今個weekend，無論係拍拖或者親子旅行，都可以參考我哋嘅馬灣8大必遊打卡熱點，過一個輕鬆好玩假期。

提提你
1. 作為旅客嘅我哋記住要保持寧靜，唔好影響當地人嘅生活呀
2. 前往馬灣必須乘搭公共交通工具，絕不可以自駕遊

挪亞方舟
講起挪亞方舟，無論你係任何宗教背景，相信都聽聞過呢個經典故事。而呢個主題公園，就係根據呢個故事發展，更加係全球首個根據遠古所載一比一建造。挪亞方舟主題公園分為方舟花園、方舟博覽館、方舟生命教育館、珍愛地球館及室外等多個歷奇公園組成，主題圍繞生命教育、環保、動物保育為主。

東灣沙灘
喺挪亞方舟主題公園同碼頭中間嘅位置，就有呢個東灣沙灘，沙灘有救生員當值，亦有設備完善嘅更衣室、洗手間、沖洗區同儲物櫃。但呢個沙灘最大嘅賣點，係可以望住青馬大橋壯觀嘅景色下游水或曬太陽。

馬灣公園
公園分為多個園區，包括彩虹牆、意中園、金律廣場、主題花園、鳥望台、歷奇園地等，公園亦設有再生能源展區，但plan行程時要特別留意公園嘅開放時間為每日10:00-18:00。

彩虹牆
由10位意大利藝術家用咗接近一個月時間繪畫，畫作以立體創作，表達人世間七種不同層次嘅愛。

意中園
起點嘅雕塑代表一家人，寓意由嬰孩、成長，到戀愛階段，係一個好受歡迎嘅影婚紗照地點。

太陽館
太陽館擁有東南亞最大型、直徑達三百五十毫米嘅民用真空太陽望遠鏡，可以觀察到太陽嘅活動。另外，館內亦設有不同展覽，讓你更了解太空嘅知識。

馬灣公園古蹟館
發展馬灣嘅時候，考古學家發現呢度有唔少歷史遺跡，其中包括新石器時代中期嘅夾砂陶器碎片、新石器時代晚期嘅墓葬同馬灣人骨、唐代灰窰同清代磚窰等，現收藏於前身為馬灣公立芳園學校改建而成嘅古蹟館。

芳園書室
芳園書室樓高兩層，樓面面積約140平方米，喺1920年代建成至2003年停止辦學，被評級為香港三級歷史建築。書室活化成博物館，展出馬灣歷史，例如：漁船模型同天后誕花炮等等，仲可以重溫昔日上課情況。