【A&M Diary】90分鐘可以做啲咩？可以睇套戲、食dinner、玩密室……但你又有無諗過90分鐘可以行山兼登上港島第二高峰呢？香港雖然係一個已發展城市，市中心人煙稠密，仲有唔少高樓大廈，但喺我哋身邊都有唔少郊遊遠足路線，今次我就同A姐嚟到鰂魚涌嘅柏架山，沿路輕鬆易行，除咗有勁多打卡位，仲睇到港島東同九龍東嘅維港靚景，90分鐘絕對值得！
前往方法
1. 喺鰂魚涌港鐵站落車，行至海山樓旁邊嘅鰂魚涌市政大廈，就係今次路程嘅起步點
2. 柏架山道雖然係行車嘅水泥路，但除咗的士、具通行證同政府車輛外，其他車輛係唔入得，自駕遊嘅字母粉可以泊喺鰂魚涌區內停車場
提提你
1. 由起步點至終點雷達站，路程約個半鐘，全程為水泥路，唔算太辛苦，屬於初級至中級路線，記住要量力以為
2. 沿路設有3個洗手間，但沒有補給站，記住自備足夠飲品
3. 大家記住保持環境清潔，自己垃圾自己帶走，絕對唔可以破壞大自然環境
柏架山
位於港島東區嘅柏架山海拔532米，除咗係東區嘅最高峰，亦係香港島繼太平山之後嘅第二高峰。柏架山嘅郊遊路線亦屬於大潭郊野公園（鰂魚涌擴建部份）一部份。
林邊生物多樣性自然教育中心
詳情：活化鰂魚涌紅磚屋由通識開始 林邊生物多樣性自然教育中心
林邊生物多樣性自然教育中心又名「紅屋」係二級歷史古蹟。前身為1922年嘅林邊屋，係太古糖廠及太古船塢歐藉職員宿舍，樓高兩層，外牆由紅磚建成，屬早期英式建築設計。1972年因為太古糖廠結束營業而被空置。曾經活化成國際文化事務協會嘅紅屋藝術展覽中心，後嚟喺2012年由漁農自然護理署接手管理，並改建為林邊生物多樣性自然教育中心。教育中心內有唔少喺叢林生活嘅動植物介紹，絕對係一個適合親子參觀同學習通識嘅地方。另外，外牆嘅英式紅磚設計亦係一個A姐推介嘅打卡熱點！順帶一提，林邊生物多樣性自然教育中心內設有洗手間同提供免費斟水嘅地方，臨走前就先補給吓啦！
開放時間：星期一、星期三至星期日及公眾假期 09:30-16:30
鰂魚涌樹木研習徑
詳情：置身歷史遊走大自然 鰂魚涌樹木研習徑
鰂魚涌樹木研習徑除咗可以了解樹木，仲有一個日戰時期嘅軍事遺蹟，係一個集歷史同大自然嘅行山路線。但因為好多人嘅目標係柏架山雷達站，而為免兜路，所以就放棄呢條鰂魚涌樹木研習徑，就繼續沿水泥路往雷達站出發。我哋就建議為免消耗體力，可以選擇回程嘅時候再作遊覽。順帶一提，呢度亦係一個交匯站，除咗鰂魚涌樹木研習徑，旁邊就係金督馳馬徑同康柏郊遊徑嘅入口。
柏架山道第一燒烤區
嚟到柏架山道第一燒烤區設有行程中第二個洗手間，而喺洗手間嘅旁邊就有一個觀景台同涼亭，各位字母粉可以喺呢度稍作休息同飽覽鰂魚涌嘅市景，而最高嘅建築物就係東區最高大廈：港島東中心（One Island East）。另外，喺燒烤區經常有野豬出沒，大家記住同野生動物共融，唔好傷害佢哋亦唔需要餵飼佢哋。
大風坳
上到嚟海拔320米嘅大風坳，就完成咗大概5份之3嘅路程，記住去埋洗手間，因為呢個係上柏架山雷達站前最後一個洗手間喇！大風坳亦係多條港島行山遠足路線嘅交匯站，除咗可以去到今次行程目的地嘅柏架山，仲可以前往其他目的地，例如：畢拿山、小馬山、港島徑、野豬徑同大潭水塘（詳情：超靚石橋週末郊遊 大潭水務文物徑）等地方。另外，字母粉記住唔好錯過大風坳嘅野餐區，呢底可以俯瞰大潭水塘嘅景色。
大雷達站
離開大風坳之後，就要由320米登上532米嘅柏架山。中途亦設有涼亭同長凳可以稍作休息，景觀就以香港東海岸一帶為主，夠晒開陽。一直行直至見到分叉路，左邊就係小雷達站，而右邊就係大雷達站，而我哋就先去大雷達站。有唔少人會叫大雷達站做大波波，呢個大波波係2004年啟用，用以探測天氣或覆蓋範圍內嘅航機距離同高度等資料，以確保航空交通安全。雷達站係閒人禁止進入嘅區域，喺門口影完相，都唔好咁快走住，大雷達站旁邊設有一條小徑，由小徑行入去，就會睇到柴灣、小西灣、東龍島同石澳全景，真係好靚呀！
