[上水好去處] 上水燕崗魚米之鄉農耕體驗半日遊

【A&M Diary】「Made in Hong Kong」曾經係享譽國際嘅品質保證，直至80-90年代，香港工業轉型，服務性行業、金融地產行業成為香港嘅重要支柱。但近年，多咗人重視本土文化，包括本地農產品亦多咗人關注。今日就同A姐參加咗賽馬會“創不同”社會創新實驗室主辦嘅本地旅行實驗室，嚟到上水燕崗村體驗魚米之鄉嘅農耕半日遊。

賽馬會 "創不同" 社會創新實驗室
2016年由香港賽馬會慈善信託基金捐助成立，透過社區參與、與政府部門合作而共創實驗，以改善公共生活。實驗室不定期會喺各區舉辦活動，融入大眾生活，而今次嘅本地旅行實驗室就吸引咗我哋參加喇！

本地旅行實驗室
疫情嘅呢一年，全球遊客都無得出國，只可以本土旅遊。雖然香港面積唔大，但香港亦有唔少本地景點，無論係懷舊嘅老香港城區、無邊天際嘅郊遊路線都成為大家放假嘅熱門旅遊點。所以今次賽馬會“創不同”社會創新實驗室帶領我哋由上水燕崗村起步，發掘北區城鄉嘅生活故事，體驗農耕本地遊！

燕崗村
屬於上水鄉事委員會範圍，由新界原居民之一嘅侯姓族人建立。

燕崗村公所／燕崗村文物館
燕崗村喺七十年前開始種植本地米，當時嘅燕崗米除咗供應本地，亦供應遠至美國嘅舊金山。雖然本地農業逐漸式微，而燕崗亦無再種植稻米，但為保留歷史，村民將燕崗村公所改建為農耕文物館，展示過百件超過一世紀嘅農耕工具。文物館內嘅展品極具價值，但所有展品可以用手觸摸，等大家可以親身互動感受。

文物館導賞員兼村民Robert，就特別介紹呢部全港只係剩返五至六部嘅木製風櫃，當時禾穀收割曬乾後，就會放入風櫃嘅斗，然後用人力攪動風葉，將禾穀分類。文物館其他珍藏仲有手動水車、捉魚嘅魚籠，三叉戟等。

燕崗農田
呢度嘅農田種植咗唔少本地農作物，其中包括芋頭、粟米、木瓜、生菜、菜心等等，農民每日日出而作，日入而息，自給自足之外，部份亦有售賣予附近街市商戶。

開心農莊
最後一站嚟到開心農莊，農夫笑稱自己係「傻佬」，因為佢種植嘅農作物，唔係自己食，係會送去附近嘅老人院，朋友都笑佢傻，所以就有呢個花名。同「傻佬」傾偈嘅時候，見到佢成日笑容滿面，令我哋深深感受到佢喺呢度簡單但滿足嘅生活。之後，我哋喺「傻佬」嘅農地上「偷」咗唔少通菜，佢話摘菜又攰又辛苦，聽到就唔開心，所以佢叫我哋去「偷」菜，因為「偷」先至刺激好玩！

最後我哋將「偷」返嚟嘅通菜，用柴火煮嚟食，新鮮嘅通菜真係特別鮮甜呀！而「傻佬」仲為我哋特別煮咗南乳豬手同魚片雞粥，作為今日農耕體驗嘅豐富午餐。

閱讀全文

瀏覽 A&M Diary網頁