【A&M Diary】去屯門食咩好？梗係食屯門牛啦！嚟到屯門嘅牛皇莫打邊爐，手切肥牛就係人都識，無乜特別，但牛皇莫以本地第一騸牯牛買手主理而聞名，仲可以試到唔少刁鑽部位，無論係味道定口感，都顛覆你嘅想像。
炸黃金魚片頭
魚片頭外表爽脆，肉質充滿濃濃嘅魚肉香味，無諗到以牛肉出名嘅牛皇莫，都有呢道咁出色嘅魚肉炸物。
墨魚滑
墨魚滑嘅墨魚味相當濃厚，用料十足！食落有墨魚鮮味之餘，入面仲有粒粒墨魚肉，非常爽口彈牙。
封門柳
鐘意食肉味嘅牛肉控，點可以唔試吓成隻牛當中，肉味最重嘅部位呢！封門柳緊貼住牛嘅橫隔膜肌肉，平時出去打邊爐都會見到，但由於每隻牛只有一條，所以手快有手慢冇。
肉眼邊
平時出去鋸扒成日會叫肉眼扒，而肉眼邊顧名思義就係肉眼扒外圍嘅肉，又有人叫佢「吊籠伴」。同封門柳一樣，每隻牛都只有極少量嘅份量可以做到肉眼邊，有肉眼嘅肉味，但又冇咗肉眼扒會出現嘅韌，真係好適合打邊爐。
牛白肉
又稱牛胸油，係牛胸口旁邊嘅脂肪，雖然係脂肪，但只要放落湯度淥一淥，就瞬間變得口感煙韌，仲有少少牛味，唔會好似食緊一團油咁。店員私心推薦我哋夾埋我地叫咗嘅脂肪唔多嘅肉眼邊同清甜嘅封門柳一齊食，真係雙重享受！
鮮牛脷
呢度嘅牛脷係薄切嘅，厚薄完全掩蓋唔到佢濃濃嘅牛味，完全係顯示到佢嘅質素。
