【A&M Diary】有一種味道叫「地道」！今日嚟到上環，好隨意咁經過一牛越南粉專門店，門前傳來一陣濃香嘅牛肉湯味，突然回憶起以前同M佬去越南旅行，夜晚一定要食番碗熱辣辣嘅PHO做宵夜，咁先夠滿足。所以我哋今晚就食個地道越南餐啦！
香茅雞翼
成日都話雞翼係小食之王，所以又點少得order一份呢？雞翼係單骨，總共有八件，雞翼炸到脆卜卜呈金黃色，外脆內juicy，加上香茅味，夠晒惹味。
越式春卷
春卷外皮超酥脆，餡料有蟹肉、蘿蔔絲、木耳絲等，口感非常豐富，加埋魚露一齊食，真係好豐富好有層次，夠晒開胃。
雞絲扎肉河粉
河粉超滑！但一上枱時，記得第一時間將配菜浸湯，咁湯底嘅味道就更有層次。扎肉兩大塊，重點係厚切，好好味！雞絲份量唔少，而湯底清香鮮甜。
越式牛肉火鍋（1人用）
火鍋配料十足，有美國雪花牛小排、手打牛丸、黃油牛腩、牛展、牛筋膜、牛白肉、美國牛肩胛、鵝帝菜、金菇、鮮冬菇、生菜、越式肥芽菜同越南河粉，份量超多，夠晒抵食！先講湯底，湯底係用牛肉清湯，清香嘅牛肉味，十分吸引！美國雪花牛小排輕輕一勺就食得，肉味香濃；手打牛丸勁爆汁，好彈牙；美國牛肩胛嘅牛味濃郁，好有口感；黃油牛腩嘅肉同脂肪比例啱啱好，夠晒軟腍；越式肥芽菜條條都漲卜卜，好有口感。
