【A&M Diary】我哋買咗車喇！其實我同M佬上年一齊學車，結果我1 take就pass咗，而M佬就考咗2次，竟然我有嘢叻過佢（佢話因為佢考試時嘅路面情況比較混亂喎），哈哈，係咩？我哋本身學車係諗住去旅行時可以自駕遊，但依家無得去旅行，只好留喺香港自駕遊啦！其實香港嘅交通好方便，所以我哋都睇吓有啲咩地方要揸車先去到，順便練吓車，今日我哋就嚟到青衣嘅青嶼幹線訪客中心及觀景台。
以前每逢假期，我哋都會去旅行，而每次入機場都會經過青馬大橋，唔知你覺唔覺得青馬大橋真係好靚呢？真係好想落車同條大橋影吓相。想同佢影相原來可以嚟到青嶼幹線訪客中心及觀景台。
訪客中心
仲記唔記得1997年青馬大橋嘅煙花匯演？當年嘅煙花瀑布真係嘆為觀止！喺訪客中心除咗記載呢個片段，仲有好多青馬大橋嘅介紹。青馬大橋係全球跨度最長嘅行車鐵路雙用懸索吊橋，大橋全長1,377米，跨越馬灣海峽，連結咗青衣同馬灣，所以「青」係指青衣，而「馬」係指馬灣，離海面高62米，而橋頂就係206米。
青馬大橋為雙層設計，上層為3線雙程快速公路，而下層就係東涌綫同機場快綫嘅路軌，同2條單線行車道路。由1992年5月25日開始動工，至1997年4月27日由前英國首相戴卓爾夫人、港督彭定康同布政司陳方安生主持開幕儀式。
呢度嘅訪客中心除咗介紹青馬大橋嘅歷史，當然仲有介紹大橋嘅結構同建築上嘅困難，資料都好豐富㗎！而重點就係有冷氣啦！
觀景台
「嘩！金門大橋呀！」我哋太耐無去過旅行喇，所以我哋都有啲妄想症喇！
其實青馬大橋、巴拿馬運河、英法海峽隧道同金門大橋等，並列為「20世紀十大建築」。所以我哋嚟到觀景台，都不停咁影相自拍，因為平時坐巴士都未能好好咁細味呢條大橋。而觀景台除咗睇到青馬大橋，其實都可以睇埋汲水門大橋同汀九橋，都非常壯觀。
