【A&M Diary】Pizza上面放上菠蘿，啲意大利人話好葵介。嚟到佐敦嘅Pizza Max Bistro，餐廳由印度人主理，店主試試新意思，將印度烤雞放上pizza，相信同樣震驚意大利人，但原來味道唔錯，呢種crossover嘅感覺，為味蕾帶嚟新鮮嘅口味。
特製醬雞餃
Chicken Mo Mo係尼泊爾嘅特色菜，一份八隻可以揀煎或蒸，但老闆人超好，可以俾我哋一半煎一半蒸，試晒兩款口味。煎嘅Mo Mo煎到金黃色，煎到脆卜卜，夠晒香口；而蒸嘅咖喱味就更突出，香濃惹味。食嘅時候，可以點上配備嘅辣醬，但個辣醬真係勁辣，怕辣嘅朋友真係要小心。
去骨咖喱雞 配 牛油烤餅
食印度菜又點少得咖喱呢！大大件嘅雞肉預先起骨，食嘅時候啖啖肉，非常方便，至於雞肉嫩滑，索晒香料層次十足嘅印度咖喱。身為印度咖喱最好嘅朋友，當然就係牛油烤餅啦！一份牛油烤餅有四大塊，淡淡嘅牛油香配上濃郁嘅印度咖喱，絕對係perfect match。
Tandoori Chicken 印度薄餅
以三色甜椒配上薄荷沙律醬，令Pizza色彩繽紛，視覺都能投入美食。至於Tandoori Chicken 印度薄餅用上薄身嘅餅底，脆身更具口感，而配料有嫩滑嘅印度烤雞、洋蔥、甜椒、蘑菇。味道以薄荷沙律醬為主導，而且加添沙律醬，又能夠中和薄荷嘅刺激感，非常清新，唔會好飽好滯。
