【Now新聞台】截至早上11點，1小時內《彭博》用戶關注度上升最多的港股，依次為：永利澳門、金沙中國、銀河娛樂、美高梅中國、澳博控股。
澳門政府今日起展開嘅修改博彩法公眾諮詢，導致澳門賭業股全線爆瀉。有消息指可能會取消發放副牌制，令持有緊副牌嘅外資公司跌最多，金沙半日都跌超過25%，創最大跌幅紀錄。
富昌證券聯席董事譚朗蔚表示，雖然仲係諮詢階段，但對市場而言正正就處於最唔明朗嘅階段，令到人人爭住沽，導致股價爆跌。Stevan表示，賭業股今日低開之後持續低走，今日半日成交已經超越昨日全日10倍，市場大力沽出股份，反應市場極度擔心賭股前景，情況完全唔樂觀。
