【Now新聞台】截至早上11點，一小時內《彭博》用戶關注度上升最多的港股，依次為龍湖集團、中國平安、恒生銀行、海底撈及中國銀行。
官方收緊金融機構喺内房衍生產品方面活動，或會令内房債務危機加深。今朝十點後，多隻内房股走勢轉差，當中龍湖股價一度跌近6%，創近14個半月低位。
京華山一國際研究部主管彭偉新話，市場開始擔心内房公司未來融資，國策收緊好可能令負債重嘅公司攞唔到足夠資金，繼而進一步擴散整體流動性風險。佢相信龍湖係其中一間投資者想避免投放資金嘅公司，股價短期冇可能逆轉返好，目前RSI同股價穿低足以反映投資者信心不足，相信會繼續下試30元大關。
