【Now新聞台】截至早上11點，1小時內《彭博》用戶關注度上升最多港股，依次為金沙中國、美高梅中國、永利澳門、醫渡科技、中國石化。
據券商最新統計顯示，2月上半個月，澳門日均博彩收入約2億澳門元。 摩根大通認為，賭股有追落後條件，而大行普遍較睇好金沙，原因係金沙唔係靠高端客食糊。今日6大賭股都有得升，金沙、銀河娛樂一度係表現最佳藍籌，美高梅更連升第7日，如果要喺金沙、美高梅二揀一，邊隻較值博？
安山資本資產管理部董事黃志陽指，美資賭股風險比較細，因為美國總統拜登政策唔算太強硬。睇返永利公布嘅數據，高端中場收費項目跌幅較細，所以做高端中場嘅美高梅、永利，股價反彈力度較大，金沙主要做大眾市場，當疫情退卻，短線嚟講，高端中場會行先，但金沙就要等成個市場好返啲，先可以追落後。
