【Now新聞台】截至早上11時止，《彭博》Top Search No.1為碧桂園，第2位至第5位為石藥集團、周大福、中國平安、美團點評。
內房股今日跟隨大市向下，幾乎全線下跌，其中碧桂園更跑輸同業，跌幅一度超過3%。呢個板塊跌得咁勁，係咪同全國房貸利率按月上升有關？
騰祺基金管理投資管理董事沈慶洪表示，之前內房炒起係因為預期息口會向下，點知房貸利率按月不跌反升，令投資者同預期有落差，更憂慮房地產作為內地重要經濟市場，貸款利率上升會拖累市場表現，繼而影響埋內地整體經濟。
不過，Patrick認為內地貨幣政策仍然傾向寬鬆，所以市場唔使太擔心，可以再觀察多幾個月，睇吓利率係咪持續上升，定只係偶然一個月向上，又認為內房股今日只係借勢調整。
