【Now新聞台】截至早上11時止，《彭博》系統Top Search No. 1為中電，第2至5位依次為恒安國際、九倉置業、佳兆業集團及中信股份。
2018年仲有唔夠30個交易日就結束，今年暫時係淡友大勝嘅一年，市況弱勢，想避險但又唔想揸Cash嘅投資者，可能就會揀股價波幅較低嘅股份，相關嘅交易所買賣基金(ETF)亦吸引資金流入。睇返追蹤有關股份嘅MSCI全球最低波幅指數，今年以來錄得超過1%回報，遠遠跑贏跌5%嘅MSCI世界指數。事實上，由2003年起截至上月嘅累積回報表現，低波幅指數升3.65倍，表現亦都好過升3.07倍嘅世界指數。唔通真係「淡定有錢淨」，專揀啲唔Chok嘅反而更賺錢？
Winnie話，要十幾年一直買一樣唔太Chok嘅嘢，要相當有定力，而且當個市好，或者波動性大時，低波幅指數都曾經試過單月要跌4%，但表現最好嗰個月可能都只係升約6%。Winnie又認為，低波幅指數可能會比較啱唔得閒成日睇住個市嘅投資者，因為如果日日眼見個市大升，但自己冇買到，輸嘅感覺會更強烈......
