【Now新聞台】截至早上11時止，《彭博》系統Top Search No. 1為小米集團，第2至5位依次為中國交通建設、石藥集團、美圖公司及阿里健康。
2007年面世嘅iPhone，係帶動蘋果公司成為美國科網股王、成為首間市值突破萬億美元企業嘅主要功臣，但近期接連有關於iPhone銷情失色，影響生產計劃嘅消息，iPhone升級周期係咪已經去到尾聲呢？Google Trends中"iPhone"呢個字眼嘅搜尋熱度，近年高峰一浪低於一浪，用微信指數去睇，亦發現網民對iPhone嘅熱情冷卻得好快。
Heidi話，自從喬布斯離世後，市場對蘋果嘅睇法已經開始有唔同，而且就算有新變動，亦較難令市場覺得驚喜，因為當年iPhone嘅各項設計可以算係劃時代，但現時其他品牌已經開始追上嚟，用家或未必覺得iPhone性價比高，所以產品周期回落，跟住落嚟可能就要睇埋蘋果股價係咪都開始咗下跌周期。
