【Viu】樂隊晚安莉莉順利完成兩場麥花臣騷《晚安莉莉 2026 LIVE:Wish You GoodNight Lillie！》，今晚尾場獲一眾老友現身捧場，當中緋聞情侶「蔓蔓」Feanna、「石石」Stone孖住入場，係自傳緋聞後首次合體公開現身，見Feanna邊行邊大方揮手打招呼，Stone更被發現冇拉褲鏈！事後Feanna抵死喺本台IG留言tag Stone「你冇拉褲鏈」，認真識玩！之後石石就喺story以「已拉返好」嚟回應，下次小心啲啦！
呢對緋聞情侶未有停低影相，直接搵已經坐低嘅「床床」床哥一家三口！而佢哋本來係一齊坐嘅，但Feanna撒嬌話再合照就會再傳緋聞㗎啦，加上有床哥嘅勇救，最後Feanna同咗床哥調位！同場仲有周國賢、恆仔、米爺同女朋友Alice、小塵埃、Vincy等！ICHIBAN GIRLS爭「粉粉」Arvin曾傲棐就7個到齊啦！
去到音樂會嘅中段，晚安莉莉帶嚟一段Medley，有最近hit爆嘅《旋轉木馬》、《YES？NO！好唔好？話俾我知道！》、《三分甜》，唱到《三分甜》嗰陣6人齊齊落台同fans互動，成個場嘅氣氛high到不得了！佢哋仲唱埋新歌《晚安歌》，更以《我看見今晚的月色很美，你呢？》作結！
晚安莉莉完騷受訪表示寧舍感觸，全員跳出comfort zone挑戰跳唱，但相信對Sinnie同雞雞係零難度嘅！其中水金話跳得勁enjoy，當佢哋跳唱《旋轉木馬》嗰陣，全場fans特別hyper，雞雞有冇諗過拉台下嘅ICHIBAN GIRLS成員上台唱？對被石石「火車未到站」搶fo，有最大怨言嘅竟然係撞樣Sinnie？
之後講到雞雞嘅女裝look，水金話堅係心動，已入紙申請下次出trip同房，佢想做啲咩先？雞雞有冇因為太靚而多咗啲男fans？Yam直頭話要將雞雞踢出男子組添！至於提到AK拍片support兼揚言想合作，Sinnie話超期待，更懷疑AK想合作嘅私心早已喺《黑之呼吸》萌生！另外，頭場cover《講不出聲》引嚟極大迴響，佢哋又點睇？即刻去片聽歌兼睇足本訪問啦！
