【Viu】舞台劇《鬼到盡頭》昨日（31日）舉行巴士巡遊「招生」，一眾演員潘紹聰、郭羡妮、Day許軼、ANSONBEAN陳毅燊、談善言、麥沛東同陳嘉威以校服Look現身，係青春呀！首次演舞台劇嘅Day同ANSONBEAN直認緊張，所以分別向COLLAR隊友Candy、芯駖同拍檔AK取經，Day嘅重點離唔開美食；ANSONBEAN就大爆拍戲被「鬼掹腳」嘅靈異經歷！
講到《日落下的彩虹》大受歡迎，Day加入網友陣營集氣拍第二輯，仲爆「腎仔」蘇文濤有大量NG片段未公開，又呼籲大家唔好寄刀片畀「渣男」Kenji，甚至笑言睇好夏雨、郭鋒呢對「鋒雨同路CP」添！Day又提議ANSONBEAN孖鬼馬婆婆多拍片，ANSONBEAN當然讚好，但聽到要同細佬Ian Hannz拍BL就耍手擰頭喇！
至於相隔17年再演舞台劇嘅郭羡妮，自認係《恐怖熱線》忠粉兼付費會員，加上角色吸引先出山，但聽到潘紹聰要為角色添加粗口時就怕怕喇！郭羡妮又話雖然冇現場睇古天樂演唱會，但有留意網上片段，激讚古老闆跳鋼管舞好正，如果對方邀請做嘉賓一齊跳就爽咯！
此外，麥東自認想反串做女老師，就算要剃鬚同剃腳毛都得，仲話底線係全裸，嚇窒阿談呀！阿談就講返孖Lokman、邵美琪合演嘅新戲入圍《釜山電影節》，希望可以夾到期出席盛會！想知就睇足本訪問啦！
