【Viu】農夫噚晚喺澳門舉行《農夫全香港最好笑嘅演唱會》，陸永同C君繼續發揮搞笑本色，仲成功打破歷史紀錄，成為第一隊喺澳門開8000人入場、最多人數嘅粵語嘻哈組合專場演唱會！雖然票價比香港貴咗「八蚊」，但都全場爆滿，一開始農夫已經拎票價嚟「開刀」。
陸永同C君一上台就話：「全香港最好笑嘅演唱會，澳門呢邊係點我唔知，但貴過香港八蚊，唔代表會有特別㗎！」全場即大叫「回水」。跟住佢哋仲認真計數，話全場夾錢：「加八蚊！全場夾錢，六萬四蚊，買一次百家樂！輸咗冇計，贏咗聽者有份！」之後仲即席演繹經典賭場爛Gag：「入門買開閒，輸到眼坦坦；入門買口莊，唔願返香港！」笑爆，佢哋仲抵死補多句：「因為移民變咗威尼斯人！」
除咗搞笑，農夫都唱咗好多經典金曲，Encore環節仲迎來大驚喜，《風生水起》音樂一響，台上螢幕出現「琳琳姐」三個大字，有人用羅庚擋住塊面緩緩升上台，唱咗幾句之後，Kelly陳慧琳突然一手掉開羅庚現身，全場即陷入瘋狂狀態，Kelly同農夫合唱《風生水起》之後，再合唱《花花宇宙》同《紀念日》。
之後「琳琳姐」話玲玲姐唔嚟因為出面手風好順，全場又笑到碌地。陸永仲追問Kelly《大日子》歌詞：「『Kelly wanna move my body』即係Kelly過嚟郁我身體？咁鬼怪嘅？」Kelly都忍唔住笑話：「你咁講完我都開始覺得有啲怪……」全場掌聲雷動！
