【Viu】姜濤一連3場《KEUNG TO “LAVA” LIVE TOUR 2026 - MACAU》已圓滿落幕！澳門最終場當中，姜濤再度邀得COLLAR成員許軼（Day) 做嘉賓， 當姜濤唱到《Every Single Time》中段時，著住背心短裙嘅Day火辣登場同姜濤跳貼身舞，場面好hot！ Day話要以小挑戰考驗師兄嘅聰明才智 ，姜濤搞笑話：「阿叔年紀都唔細，你唔好玩阿叔。」Day引導姜濤擺出可愛姿勢，翹起右腳並側頭跳舞，有趣啊！之後，二人合唱《戀愛達人》時仲手拖手，令全場粉絲尖叫不斷！
到「驚喜彩蛋」環節，姜Admin就話大家唔會估到，然後佢就介紹：「佢係一位喺所有舞蹈界、音樂界都好尊敬、稱之為藝術家嘅天王巨星。」之後經典金曲《You Are Not Alone》嘅音樂就響起，姜Admin坦言唱呢首歌係非常緊張：「呢首好緊張，我英文又唔叻！我真係好記得，Michael Jackson係一位由細到大，覺得好厲害好厲害、神一樣嘅人。今年自己去睇佢套戲嘅時候都好感觸，但係亦都更加提醒我自己，佢呢一生人都將好多正能量、好多愛、好純真嘅嘢話俾呢個世界嘅人聽。」
姜Admin亦向大家寄語：「雖然呢個世界未必每一位理解到你嘅諗法，或者好多誤解，甚至好多時候喺當中迷失過。但係歌曲嘅力量，就係令到我哋記起心中最純真嘅一面，永遠都唔孤獨。」 佢亦唱出《亞特蘭提斯》、《I Need You In My Li(f)e》《鏡中鏡》等歌曲，真係令人回味啊！
回帶返姜Admin第2場嘅演出，當晚嘅「驚喜彩蛋」就係《李香蘭》！姜Admin一開頭有少少蝦碌，唱咗「惱春風」就叫停咗，大呼：「好尷尬，好似未試過咁」佢自己都忍唔住同大家一齊笑，仲叫大家一齊數10秒後刪除所拍嘅片段，好可愛！姜Admin平復情緒之後就投入返去唱歌，佢唱得感情豐富，仲喺最後豎起手指公畀Like！快啲睇現場實況啦！
