【Viu】ViuTV綜藝節目《8點直樂VIURIETY》今晚「Play Hard Night」有ERROR二子Dee哥 x 保錡，再加兩位嘉賓Phil林奕匡 x Ryan Choi！Dee哥化身「白馬王子啷啷」喺「公司無逼我表演」環節同Mishy battle彈琴，佢笑話騷前全靠有Mishy惡補成天才，又爆細個堅係學過彈琴㗎，但呢日Dee哥明明係彈奏《瑪莉有隻小綿羊》，保錡卻誤以為係《有隻雀仔跌落水》，究竟中間有咩誤會？走音係因為有小綿羊走失？
Dee哥又豪言彈琴呢個item係可以再encore嘅，橫掂佢亦未找數着leggings，保錡大膽拋橋兄弟可以着住leggings、用腳趾彈琴，而曲目方面Dee哥就自薦係古典音樂「貝殼芬」，齋聽都相信呢個item一定爆，咁幾時有得睇先？保錡就同「世一」Ryan交手，抵死自嘲被Ryan刺中紅心係好lucky，好運即刻返晒嚟！
新劇《喜劇開場》即將播出，主演之一嘅Dee哥話好緊張，但應該未有機會同劇組一齊睇直播！對有網民野生捕獲本尊凌晨開工拍劇，佢指呢期的確係辛苦啲，不過拍得開心又期待！
喺「情與義」環節，Phil同Ryan分別以計數、打劍，互幫對方爭取宣傳新歌《特務占士匡》、《我最討厭的男歌手》！Phil謙指細個計數更叻，喺加拿大參加奧數成日攞冠軍㗎，堅呀，咁歲半有多嘅囝囝Darrien咪有幾遺傳到呢個優良基因？
呢日亦係Ryan獻出處男live show，直言有Phil陪同安心啲，又唔似得喺「某人」E先生身邊容易講錯嘢咁話！經過上次出騷唱到急尿之後，Ryan有冇長一智去定廁所？另外，Ryan喺Ivy So@COLLAR新歌《原地拖手》MV最後一幕粉墨登場，佢話獲邀參演係好榮幸，不過因為身邊有太多friend鍾意Ivy，所以會預咗收到唔少「問候」！問到之後出歌搵返Ivy做MV女主角嗰陣，Ryan就大賣關子啦！
