【Viu】ViuTV全新綜藝節目《8點直樂VIURIETY》即將於18號同大家見面，今日率先舉行記者會介紹一連五晚嘅節目加主持人，更率先示範節目遊戲，從而預告精彩內容！期間笑料不斷，例如肥仔化身勇者試食由沈殷怡親製嘅雞絲芝士奄列，jap到拉晒絲；仲有溫Thomas湯馬仕孖阿Dee試玩Jackpot，Thomas大力推走阿Dee出廠景外，全程笑到gap gap聲！
事後阿Dee笑言仍然心有餘悸，形容比「火車頭」Thomas一推，體感時速150，好似要將佢由將軍澳推去機場咁，SLDPK！阿Dee又預告ERROR喺節目中特設創意無限小劇場，仲自封為男主角添，呢單嘢問過隊長肥仔未先？佢哋又追加預告193即將放完悠長假期，有機會合體呀！唔知宣傳緊電影《寒戰1994》嘅阿Dee，又可以call到邊位猛人過嚟一齊玩？
COLLAR嘅Winka、Candy就話會化身邱比特，幫女參加者物色男伴，有冇諗住搵肥仔同阿Dee？阿Dee抵死度橋叫肥仔集集都上去「食個檸檬」就走，係咪想笑死人？Candy大讚「舅父」肥仔幽默感高之餘，仲係「體智高」添！唔怪之得Candy都話想參加節目啦，但已有男友嘅Winka就enjoy做紅娘，唔知佢最近有冇睇男友朱芸編喺劇集《IT狗2.0》嘅演出？佢搞笑話男友完美演繹斯文敗類律師，仲想知Winka講咗啲咩？咁就睇足本訪問啦！
