【Viu】ERROR合體啦！喺今晚ViuTV全新綜藝節目 《8點直樂 VIURIETY》首唱新團歌《我們不分》，之後搵埋《極度俏郎君》嘅buddy「黑哥」姜皓文演小劇場「時空管理員」，逐個自抽大解放，最後再喺「公司無逼我表演」大晒舞技，funny指數5**！
事後四子受訪表示以新歌粉碎「拆夥」傳聞，將團魂show畀大家睇之餘，更升呢做實力唱將！咁幾時可以聽晒成首？會唔會拍MV？照傳統搵女神做女主角？
久未合體嘅ERROR，直言見到班404好感動，然後又突然一秒入戲，用感觸mode表示呢個廠正係錄《全民造星》嘅廠，繼而保錡憶起當年有單笑料，喺廁所撞正用水樽當咪練唱嘅193，再以「師兄」之稱妙問係鍾意男定女，SLDPK，唔知193點答？
點知一單好笑過一單，輪到193諗起阿Dee當年下半身齋着legging個「現代look」，唔講由自可，呢個話題一講就一發不可收拾，好耐未試過ERROR大暴走啦！3個輪住攻擊阿Dee呢個無懈可擊嘅leggings造型，肥仔更貼心幫手起題「穿leggings的阿Dee」、「初代阿Dee」，交畀大家細味吓呢兩個組合嘅用字！阿Dee係咪會喺下星期同樣時間嘅小劇場環節以leggings示人？佢更加碼立flag，如果條訪問片有1萬個like即着？
到最後佢哋都有公開爭取團綜拍攝地，又拋橋話可以同黑哥一齊拍大冒險！193個首屆藝人爆旋陀螺比賽籌備成點？佢仲自爆諗到個發達大計，對象係公園嘅小朋友，肥仔聽到忍唔住話佢賤，笑死！對點解唔係3子一齊入玻璃櫃探193，原來一切係阿Dee嘅妙計，果然係用心良苦呀！
另外，黑哥笑指呢日上嚟係打救ERROR四子，希望《俏郎君》堅係可以拍續集！至於釗峰見到義氣女米媽浸冰桶幫佢爭取時間打歌，佢又會點報答返米媽？足本訪問is ready，小心臨瞓前笑到有腹肌呀！
