【Viu】阿正、「肥腸」徐浩昌、Ashley林愷鈴、黃德斌、蔡子健、張達倫、陸駿光等今日出席ViuTV原創劇《COURT!》記者會，阿正今次要收起幽默本色演警察，早排配音時自覺演出太肉緊，笑言辛苦其他拍檔。「六膠」肥腸雖然冇同場，但都有喺化妝間偶遇，仲話畀阿正嘅「狠樣」驚艷到添呀！
講到阿正擔任Jeffrey新歌MV女主角，佢就澄清係獲邀，絕無自肥，又爆如果拍埋咀戲就要收錢㗎喇！阿正笑認對「魚翅」Jeffrey零心動，仲封肥腸做「碗仔翅」添！咦？咁如果加錢演《色，戒》級數嘅床戲又得唔得呢？阿正同肥腸嘅轉數就令女神Ashley笑到標眼水啦！
至於四大型男黃德斌、蔡子健、張達倫、陸駿光就細數邊位係前輩，德斌真係當之無愧喇！闊別幕前十幾年嘅蔡子健仲話係因為杜琪峯導演同監製朱淑儀而一口答應出山，演出獲四位幕後功臣朱淑儀、導演吳家偉、監製游乃海同編審潘漫紅一致激讚！想知就睇足本訪問啦！
