【Viu】草蜢出道40周年，一連七場「GRASSHOPPER THREE IN LOVE草蜢演唱會2026」噚晚喺紅館圓滿落幕，fans三度encore唔肯走，氣氛high爆！講到全晚最溫馨又搞笑環節，一定係噚日「登六」嘅壽星仔蘇志威。蔡一智同蔡一傑喺台上送紅包俾蘇老闆，仲輪住同壽星仔咀嘴。點知紅包入面原來係一張「樂悠咭」，蘇老闆笑住話：「我覺得我攞呢張『樂悠咭』無愧，因為我哋都係香港仔，三個喺屋村打出嚟嘅香港三人組合，為香港音樂圈40年做咗好多嘢，我值得。」之後全場大合唱生日歌，蘇志威感動到眼濕濕：「好開心呢度有1萬2千人同我擺60大壽，係個天俾我嘅恩賜！」
草蜢呢晚仲請到郭富城任嘉賓，佢哋跳唱《失戀》嘅時候默契十足，之後城城率領全場一齊講新口號同做手勢：「聽我講，一齊企硬，撐草蜢」，笑爆！城城大讚草蜢：「好欣賞你哋，中段唱咗20幾分鐘快歌，我睇到草蜢嘅執著與堅持呢份信念，所以40年企喺舞台上有咁多fans支持！」蘇老闆即時回敬：「其實你都keep得好fit，我哋希望50周年都可以請你嚟做嘉賓！」草蜢仲送咗個水晶獎座俾城城，上面刻住「KING OF STAGE」，話佢哋心目中嘅舞台王者非城城莫屬。之後四子跳唱《唱這歌》，一齊做城城嘅招牌單腳企甫士，全場 high爆！
演唱會完結後，觀眾狂嗌encore唔肯散場，草蜢再度上台即興加唱《歲月燃燒》。點知佢哋離場之後，fans繼續encore，草蜢第三度上台感謝支持，成晚玩到接近凌晨12點先至真係完場！
完騷後草蜢轉場去酒店餐廳開慶功宴，開香檳影大合照。蔡一智開心話希望有part 2！阿智就向壽星同林珊珊介紹「樂悠咭」有咩著數，笑爆全場。之後眾人大合唱生日歌，蘇志威囡囡Yumi親手整咗個桌球與波枱造型嘅生日蛋糕，切完蛋糕阿智同傑仔左右夾攻錫面賀壽，阿智笑住話：「頭先台上錫咗佢一啖，我有少少後悔，因為佢個嘴好鹹！」蘇志威同太太劉小慧、兩個囡囡Yumi同Ina喺台上攬攬錫錫，溫馨到爆！快啲睇片啦！
