【Viu】MIRROR官方歌迷會主辦嘅《Hi MIRO! Garden Party 2026》，噚晚舉行第一場，由Aton王智德打頭陣，佢著住醒神黃色外套、戴住黑超，踩住單車入場，配埋背景歌曲，型到裂啊！ MIRO就舉起賽車方格旗為Alton打氣，一開場氣氛已經相當好！
Aton踩完單車就唱《道路使用者的有型守則》 、《人畜無害》，好聽！之後，Alton就同MIRO大玩砌車遊戲，佢直言：「今次要準備4份禮物，我又唔想揀屋企唔要嘅，呢啲都係我唔捨得唔要嘅嘢嚟，佢哋嘅共通點都係我旅行嘅時候買。」Alton準備嘅禮物有喺日本買嘅《海賊王》File、喺英國倫敦買嘅《Moonwalkers》明信片、 天皇巨星做封面嘅Alton手寫生日卡、裝牙線棒嘅盒。
之後，主持「旁白君」文卓森就問Alton：「過去一年，有冇MIRO畀你嘅支持係好深刻？」Alton回應：「好簡單，之前可能會覺得會冇咁簡單，我收到一封講得好好嘅信、一件佢好似知我諗咩嘅禮物，會覺得好犀利，但係慢慢開始自己個感覺係，其實呢個感覺唔係淨係喺啱啱提及嘅例子出現，其實真係」，Alton一度哽咽，佢忍住淚水再講：「我會覺得最簡單嗰樣嘢就係你哋出現！」最後，粉絲逐一上台接過Alton所派嘅絨毛花花，人人開心！
