【Viu】上周六（20日）係《KEUNG TO ”LAVA“ LIVE 2025》第4場！姜濤喺台上分享小故事，「其實姜濤一直有分姜濤A、姜濤B，唔係你哋講嗰個姜B。過去幾年，姜濤A係好直接、好專注自己事業、專注人哋點睇自己嘅一個人。」佢直言姜濤A只會出現喺離開舞台之後，只係得身邊人有見過，又話花姐都頂唔順！
姜Admin回望過去：「佢（姜濤A）係任性，會畀情緒主導咗自己，而過去幾年嘅我就係畀好多情緒主導，無真正同自己溝通。」姜Admin分享完後，就唱出首次有份作曲嘅新歌《寂寞圓舞》。
之後，姜Admin喺唱《Better Man》前再同大家分享「姜濤B」，「姜濤B係好懂事、好理性嘅一個人，佢呢幾年愈嚟愈無辦法同姜濤A去溝通......但佢忽略姜濤A真正想需要嘅。」佢坦言：「我唔需要佢兩個對立，我需要佢哋共生，因為只有共生先可變成一個better man！」姜Admin今晚就著咗一套綠色新歌衫，並講到演唱會嘅核心「重生」一直無變，「想成長嘅時候，一定係好痛苦，但千祈唔好拋棄你過去嘅一切，記住你之前經歷過嘅嘢，繼續向前行！」
而當晚登場嘅嘉賓就係Gareth.T湯令山！姜Admin鬼馬戴住黑超cosplay返好兄弟，然後就先唱一段《用背脊唱情歌》，正啊！姜Admin唱完就搞笑問：「你平時戴黑超點睇到嘢？」佢之後又話佢今年係最鍾意呢一首歌，又問好友經歷過咩嘢先寫到呢一首歌。阿姜亦話Gareth每次都即刻明佢想要啲乜，兩個人就係喺台上互相多謝，真朋友啊！
回帶去返第3場，姜Admin同嘉賓林家謙合唱《四月物語》、《有一種傳說》，姜Admin講起佢搵家謙幫手為朋友錄打氣說話。「家謙同學」喺臨落台前送咗一下按摩畀姜濤，好搞笑！當晚亦繼續有《Every Single Time》辣身舞，Fans狂尖叫令亞博「地震」咗幾分鐘！
影片來源：讀者提供片段、IG@hkeric、IG@keung_ct、IG@randompostie
