【Viu】金馬影后李心潔喺香港首辦個人藝術展，主題《糖不甩Childtopia》，獲張艾嘉、Gigi梁詠琪現身撐場，其中Gigi更自掏腰包買入好友4幅畫作收藏！心潔又講到張姐係好鼓勵佢創作，甚至首個畫展都係由張姐幫手籌備添！現場見林嘉欣送上花籃祝賀！
心潔表示畫展籌備咗5年，又透露下次畫展主題將首挑戰畫人像，咁會唔會係畫老公彭順、一對孖仔？而喺今次畫展亦有展出孖仔嘅作品，心潔冧爆指囝囝好鍾意畫畫，私藏佢哋好多大作，遲吓幫孖仔搞個畫展？除咗畫作之外，心潔仲開心share埋孖仔唱粵語歌嘅聲帶，點知一聽係耳熟能詳嘅廣告歌？至於喺畫展嘅另一邊，心潔則展示畫咗一件外婆衫嘅作品，兼用家鄉福建話細訴與外婆嘅故事，超感人！
