【Viu】Lyman香胤宅、Sinnie@Lolly Talk、J.Arie等今日出席「香港音樂劇節2026」發佈會。喺《愛登事家庭》音樂劇中，Sinnie飾演Lyman同J.Arie嘅囡囡，未婚嘅J.Arie話唔抗拒有咁大個女，因為將來都會做媽咪，當預習。Lyman話最大難度當然係中文對白，而身為《全民造星V》冠軍嘅佢，笑稱都驚唱歌㗎！
早前有傳Lolly Talk面臨財困，因背後「金主」閂水喉，半年冇糧出，8女更倒欠公司錢。Sinnie表示上個月有出糧，而今個月就未到出糧日子，佢亦堅稱成員冇爭公司錢。Sinnie又坦承姊妹們心情有受影響，但未至於要解散，亦努力準備聽晚出騷。佢仲話團隊今年冇出歌唔關經濟事。
