【Viu】出道20週年嘅澳門雙胞胎兄弟Soler嘅Julio同Dino，日前喺澳門開騷，吸引嚟自澳門、香港、日本、溫哥華等多地歌迷到場支持！Soler以回歸樂壇的新作《翻天覆地》揭開演唱會序幕，並特別安排20人合唱團、弦樂、樂隊助陣！Soler之後再唱出《細味》、《失魂》等歌曲，真係回憶返晒嚟！
喺唱《不熄的火花》之前，「大孖」Julio有感而發話出道以嚟有好多波折，歌詞成日都好有畫面，又話曾經喺發夢時見到個浪，佢從中有所啓發：「無論遇到咩都好，要好穩定！」
Julio透露開騷係一種緣份，形容係一個奇蹟！嘉賓側田喺台上分享同Soler同樣係2005年出道：「當時感覺Soler就係escort，帶選美佳麗上台嘅人，但一開口唱歌，就好respect ，由day one 已經true to music，所以我頭先有喊。我知道你哋條路，所以我頭先好感動。」三個人演繹Coldplay嘅《Yellow》，勁有默契！側田喺唱完之後意猶未盡，問要唔要再唱多一首，話要考考Soler即場和音，三個人之後再邊彈結他邊唱出Ed Sheeran嘅《Perfect》，正啊！
講起今次演唱會嘅緣由，Julio透露一年前曾打畀身在溫哥華嘅「細孖」Dino，提議出道20週年時舉辦「告別音樂會」，但被身邊友人勸阻。Soler喺同娛樂公司接洽後就改變主意，成功開騷！去到演唱會尾聲，Soler以經典之作《海嘯》作為壓軸表演，全場觀眾起身鼓掌，相當盡興！
