【Viu】78歲羅家英自早前自爆4度罹癌後，今日首現身公開活動，精神飽滿、面色紅潤，一見傳媒即報平安：「身體健康！身體健康！萬事如意！」並中氣十足表示身體目前冇咩大礙，只因打針而令身體變虛弱，要多休息，又幽默笑指「阿姐」汪明荃叫佢唔好嘥氣做訪問，咩原因令家英哥「逆旨」？
除咗身體變虛弱，家英哥話糖尿會增高兼貧血，透露醫生落咗order叫佢打針，遲啲就去睇泌尿科！笑問阿姐係咪佢嘅私家看護？家英哥冧爆秒回，又抵死笑指阿姐依家對佢和藹咗！日前家英哥為莫文蔚西安站個唱擔任嘉賓唱《Only You》成熱話，佢話係《大話西遊》31年大聚會，之後有咩工作安排抑或休息？
同場仲有兩位久未露面嘅「細龜」黃一山、90年代性感女星Ellen陳雅倫！細龜喺內地開修腳店、餐廳，笑話將戲癮變咗做生意癮，諗住遲吓將餐廳讓畀細仔打骰！細龜指前排係有搵過周星馳，因為知對方返內地拍《少林女足》，所以想話過去探班，最終有冇見到星爺一面？
Ellen以一襲紅色緊身長裙現身，大晒驕人S身段，沾沾得到媽咪嘅優良DNA，完全睇唔出下年就轉字頭「登六」！前排佢上節目大講鬼故，呢日佢都share咗一個恐怖經歷，咁係咪要搵返個男人，用陽氣驅走啲「污糟嘢」？Ellen係咪鍾情小鮮肉？肌肉男？想知就睇片啦！
